Sansar News
२९ भदौँ, काठमाडौँ । नेपाल टेलिकमले आजदेखि ‘नमस्ते-पे’ मोबाइल वालेट सञ्चालनमा ल्याउदैँ छ । नेपाल टेलिकम र राष्ट्रिय वाणिज्य बैंकको संयुक्त लगानीमा आजदेखि नमस्ते पे मोबाइल भुक्तानी सेवाको प्रारम्भिक चरणको व्यवसायिक सञ्चालन गर्न लागिएको हो ।
यसका लागि टेलिकमले गत वर्ष नै राष्ट्रिय वाणिज्य बैंकसँग मिलेर ‘डिजिटल पेमेन्ट्स कम्पनी’ लिमिटेड खोलेको थियो । लामो समयको तयारी पछि आज ‘नमस्ते पे’ सार्वजनिक गरिन लागिएको हो ।
योसँगै नेपाल टेलिकम पनि डिजिटल पेमेन्ट सेवामा औपचारीक रुपमा प्रवेश गरेको छ । सञ्चालनमा आउन लागेको डिजिटल पेमेन्ट कम्पनी ‘नमस्ते पे’ मा नेपाल टेलिकमको ६२ प्रतिशत र वाणिज्य बैंकका ३८ प्रतिशत संयुक्त लगानी रहेको छ ।
दुई कम्पनीको लगानीमा आउन लागेकाे मोबाइल मनिको सबैभन्दा पहिलो अकर्षणको विषय अनलाइन र अफलाइन कारोबार रहेकाे छ । टेलिकमले ल्याउन लागेको मोबाइल मनिमा इन्टरनेट भएको बेलामा र नभएको बेला दुबै समयमा अनलाइन कारोबार गर्न सकिनेछ ।
त्यस्तै, मोबाइल ब्यालेन्सबाटै सामान किन्न सक्ने व्यवस्था समेत हुने टेलिकमले जनाएको छ । उक्त मोबाइल मनि सेवा ग्रामीण जनतामा केन्द्रित हुने समेत टेलिकमले जनाएको छ ।
सुरुवाती चरणमा मोबाइल तथा इन्टरनेट सेवाको भुक्तानी, विद्युत तथा पानीको बिल भुक्तानी लगायतका युटिलिटी सेवा उपलब्ध हुनेछन् । सुरुमा कारोबार गर्नको लागि राष्ट्रिय वाणिज्य बैंकमा खाता भएका ग्राहकले मात्रै बैंकसँग भएको रकमबाट कारोबार गर्न पाउने बताइएको छ । पछि उक्त सेवा अन्य बैंक वित्तीय संस्थामा बैंक खाता भएका ग्राहकको लागि पनि विस्तार गरिने कम्पनीले जानकारी दिएको छ ।
वि.सं.२०७८ भदौ २९ मंगलवार ०६:५३ मा प्रकाशित
