Sansar News
२९ भदौ, काठमाडौँ । नेपाल कम्युनिष्ट पार्टी (एकीकृत–समाजवादी) ले केन्द्रीय कमिटीको बैठक केही दिन पर सारेको छ ।
बैठक आज बस्नका लागि तयारी गरिएको भए पनि केही गृहकार्य अपुग भएको भन्दै आगामी असोज ५ गते लाई सारिएको सो पार्टीले जनाएको छ ।
काठमाडौँमा बस्ने उक्त बैठकमा पार्टीलाई प्रभावशाली ढङ्गबाट देशभर सञ्चालन गर्न सङ्गठन विस्तार, समसामयिक राजनीतिक अवस्थामा पार्टीले निर्वाह गर्नुपर्ने भूमिका तथा राजनीतिक गतिविधि सञ्चालन गर्न आवश्यक रणनीति तयार पार्ने विषयमा छलफल हुने बताइएको छ ।
नेपाल कम्युनिष्ट पार्टी (एमाले) बाट वैचारिक असहमति प्रकट गर्दै वरिष्ठ नेताद्वय माधवकुमार नेपाल र झलनाथ खनालसहितका केही नेता अलग भएर हालै गठन भएको उक्त पार्टीको केन्द्रीय कमिटीको बैठक पहिलो पटक बस्न लागेको छ ।
पार्टीका अध्यक्ष माधवकुमार नेपालको संयोजकत्वमा हालै स्थायी कमिटिका साथै सचिवालय, प्रदेश इञ्चार्ज तथा केही विभाग गठन गरिएको छ । पार्टीका केही प्रदेश, जिल्ला तथा स्थानीय तहमा भेला, बैठक बसेर राजनीतिक कार्यक्रम सञ्चालन भइरहेका छन् । युवा तथा विद्यार्थी सङ्गठन स्थापना भइसकेका छन् भने प्रेस सङ्गठन चाँडै घोषणाको क्रममा छ । मजदुर सङ्गठनलगायत अन्य भ्रातृ संस्था निर्माणका लागि तयारी भइरहेको बताइएको छ ।
वि.सं.२०७८ भदौ २९ मंगलवार १५:३५ मा प्रकाशित
