Sansar News
काठमाडौं । बागमती प्रदेशका मुख्यमन्त्री राजेन्द्र पाण्डेले मन्त्रालय फुटाएर मन्त्रिपरिषद् विस्तारको तयारी गरेका छन् । सत्ता गठबन्धनभित्रको किचलो समाधान गर्न पाण्डले मन्त्रालय फुटाउने तयारी गरेका हुन् ।
मन्त्रालय विभाजनको लागि प्रदेश मन्त्रिपरिषद्को बैठकले प्रदवेश सरकार, बागमती प्रदेश (कार्यविभाजन) नियमावली २०७४ पारित गरेको गरेको थियो । मन्त्रालय विभाजन गर्ने नियमावली राजपत्रमा प्रकाशित भइसकेको छ । प्रदेश सरकारले मन्त्रालय विभाजनमा अनुकुल हुनेगरि कार्य विभाजन नियमावली २०७४ को अनुसूची १ र २ संशोधन गरेको छ ।
हालको उद्योग, पर्यटन, वन तथा वातावरण मन्त्रालय फुटाएर उद्योग वाणिज्य तथा आपूर्ति मन्त्रालय, संस्कृति तथा पर्यटन मन्त्रालय र वन तथा वातावरण मन्त्रालय बन्ने राजपत्रमा उल्लेख छ ।
भूमि, व्यवस्था, कृषि तथा सहकारी मन्त्रालय फुटाएर कृषि तथा पशुपंक्षी विकास मन्त्रालय र भूमि व्यवस्था, सहकारी तथा गरिबी निवारण मन्त्रालय बनाइएको छ । प्रदेश राजपत्रमा प्रकाशित सुचना अनुसार भौतिक पूर्वाधार विकास मन्त्रालय फुटाएर खानेपानी, उर्जा तथा सिंचाईं मन्त्रालय, श्रम रोजगार तथा यातायात मन्त्रालय र भौतिक पूर्वाधार विकास मन्त्रालय बनाइएको छ । सामाजिक विकास मन्त्रालय फुटाएर युवा तथा खेलकुद मन्त्रालय र सामाजिक विकास मन्त्रालय नामाकरण गरिएको छ ।
बागमतीमा तत्कालीन नेकपा हुँदा पहिलो मुख्यमन्त्री बनेका डोरमणि पौडेलको कार्यकालमा सात सदस्यीय मन्त्रिमण्डल थियो । एमाले विभाजनसँगै भदौ २ मा मुख्यमन्त्री बनेकी अष्टलक्ष्मी शाक्य नेतृत्वको सरकारले सामाजिक विकास मन्त्रालय फुटाएर स्वास्थ्य मन्त्रालयसहित आठ मन्त्रालय बनाएको थियो।
वि.सं.२०७८ मंसिर १९ आइतवार १३:५४ मा प्रकाशित
