Sansar News
काठमाडौं । नेपाली कांग्रेसको प्रदेश १ को सभापतिमा हारेका गुरुराज घिमिरेलाई आफ्नै समूहबाट अन्तरघात भएको पाइएको छ । घिमिरेलाई आफ्नै समूहका डा. शेखर कोइराला, सुजाता कोइराला र महेश आचार्यसहितका नेताहरुले नै मतदान नगरेको खुलेको हो ।
उनलाई हराउनकै लागि नेताहरु मतदानमै सहभागि थिएनन् ।
घिमिरे संस्थापन–सिटौला समूहका उम्मेदवार उद्धव थापासँग मात्रै २ भोटले पराजित भएका थिए । थापाले ८ सय ४४ मत ल्याउँदा घिमिरेले ८ सय ४२ मत ल्याएका थिए ।
प्रदेश १ मा सभापतिको निर्वाचन हुँदै गर्दा पौडेल समूहले २५० मतले जित्ने हिसाब गरेको थियो ।
मत नहालेको माफी मागे शेखरले
यसैबीच मतदानमा सहभागी नभएका नेता शेखर कोइरालाले माफी मागेका छन् । सामाजिक सञ्जालमार्फत शेखरले केन्द्रीय नेताहरूले भोट हाल्न पाउनेरनपाउनेबारे पहिल्यैदेखि अलमल रहेको र कानुनी परामर्श गर्दा मतदान नगर्नु उपयुक्त हुने सुझाव पाएको बताएका छन् । साथै आफूबाट कमजोरी भएको स्वीकार्दै माफी पनि मागेका छन् ।
शेखरले भनेका छन्,‘कांग्रेसको १४औँ महाधिवेशनमा प्रदेशसम्म केन्द्रीय नेताहरूले मतदान गर्न पाउने/नपाउने विषयमा सुरुदेखि नै संशयु थियो । कानुनी परामर्शबाट मतदान गर्दा भविष्यमा जटिलता आउन सक्ने बुझियो । तसर्थ मतदान नगर्नु उपयुक्त ठानेँ । यसक्रममा मबाट भएको कमजोरीप्रति सचेत रहँदै गल्ती भए क्षमाप्रार्थी छु ।’
वि.सं.२०७८ मंसिर २० सोमवार १६:१८ मा प्रकाशित
