कर्कसा चेतका दर्दका स्रोत हुन् ।
प्रेमका शिष्टता हर्षका मूल हुन् ।।
रोप्दछौ जे तिमी फल्छ रे त्यै फल ।
प्रेम यो रोपिए हट्दछन् दुर्मल ।।०१।।
प्रेमले कर्ममा थप्छ रे साहस ।
प्रेम यो स्वच्छ हो पस्क रे ढाडस ।।
दुष्टता चेतका फ्याँक्न होस् चाहना ।
स्वच्छता पस्क रे शान्तिका साधना ।।०२।।
दोष यी साथ छन् हर्षमा पस्दछन् ।
सौख्यका मूलमा सर्पझैँ डस्दछन् ।।
सम्झना बिर्सना साथमा डुल्दछन् ।
सम्झना राखिए प्राप्तिका हार छन् ।।०३।।
प्रेम यो सम्झने शक्तिमा पोस्तछ ।
द्वेषले सम्झने शक्ति नै खोस्दछ ।।
साथमा कर्मको साधना गर्नुछ ।
सौख्य यो चेतमा भक्तिले भर्नुछ ।।०४।।
अर्थ यो जोर्नमै व्यस्त छन् मानव ।
अन्त्यमा रिक्त नै पोलिने हो शव ।।
जन्ममा रिक्त नै जन्मियो मानव ।
अर्थ यो रास होस् लान्छ यो को सब ?०५।।
हेर्दछन्, बुझदछन्, त्याग्दछन् मानव ।
सत्यमा टाढिँदै बन्दछन् दानव ।।
वस्त्रले लाज यो छोपिए पुग्दछ ।
गाँस यो पेटमा पूर्ण होस् पुग्दछ ।।०६।।
बातका साथमा शिष्टता सार होस् ।
अन्यका दर्दमा हात यो साथ होस् ।।
झेलका खेलले टाढियो मानव ।
चेतका प्रेमले फर्कियोस् मानव ।।०७।।
छन्द:स्रग्विणी
गण: र र र र
सङ्केत: SIS SIS SIS SIS
वि.सं.२०७८ मंसिर २५ शनिवार ०८:०८ मा प्रकाशित