Sansar News
काठमाडौं । नेपाली कांग्रेसको आगामी नयाँ नेतृत्व चयनका लागि हुने दोस्रो चरणको निर्वाचनमा नेता विमलेन्द्र निधिले देउवालाई सघाउने भएका छन् ।
नेतृत्व चयनका लागि सोमबार भएको निर्वाचनको मंगलवार बिहान सम्पन्न मत गणनामा देउवाले २२५८ मत ल्याए पनि विजयी हुन नसकेपछि दोस्रो चरणमा हुने निर्वाचनमा निधीले उनलाई सघाउने बताइएको छ ।
सोमबार देउवाले पहिलो चरणम जित्न नसक्ने र दोस्रो चरणमा अध्यक्षका प्रत्यासीहरु एक भएर देउवाको विकल्प खोज्ने बताएका निधिले अन्ततः मंगलवार बिहान देउवा निवास पुगेर आगामी एक कार्यकालका लागि देउवालाई सघाउने बताएका हुन् ।
आज दिउँसो ३ः३० बजे हुने कांग्रेस निर्वाचनको दोस्रो चरणमा सभापतिमा शेरबहादुर देउवा र शेखर कोइरालाबीच प्रतिस्पर्धा हुनेछ ।
पहिलो चरणमा सभापतिका अर्का उम्मेदवार शेखर कोइरलालाई पछि पार्दै २२५८ मत ल्याएर पहिलो बनेका शेरबहादुर देउवालाई कांग्रेसको आगामी नेतृत्व सम्हाल्नका लागि जम्मा ८२ मत कम भएको थियो ।
यसअघि आफ्नै निवास चाक्सीवारीमा पुगेका नेता वालकृष्ण खाँडसँग साथीहरुसँग सल्लाह गरेर आफ्नो निर्णय सुनाउने भनेका प्रकाशमान सिंहले पनि देउवालाई नै समर्थन गर्ने भएपछि सिंहसँग सल्लाह गरेर निर्णय सुनाउने बताएका निधिले देउवालाई नै समर्थन गर्ने बताएका हुन् ।
सिंह र निधिको साथ पाएसँगै देउवा नेपाली कांग्रेसको आगामी कार्यकालका लागि सभापतिमा विजयी हुने निश्चित जस्तै बनेको छ ।
पहिलो चरणमा हारेका देउवाले दोस्रो चरणमा पाउलान् त सिंह र निधिको साथ ?
वि.सं.२०७८ मंसिर २८ मंगलवार १३:०२ मा प्रकाशित
