हामी सबैकाे संसारन्यूज

काठमाडौं । जनता समाजवादी पार्टीका अध्यक्ष उपेन्द्र यादवले नागरिकता प्रमाणपत्र नहुनेलाई पनि मतदानमा सहभागी गराउन माग गरेका छन् । निर्वाचन आयोगको पछिल्लो तयारीप्रति विरोध गर्दै उनले यस्तो माग अगाडि सारेका हुन् ।

यादवले नागरिकता प्रमाणपत्र नहुनेको नाम मतदाता नामावलीमा समावेश नगर्नु असंवैधानिक र अन्तराष्ट्रिय कानून विपरीत हुने तर्क गरेका छन् ।

‘लाखौं जन्मसिद्ध नागरिकहरूका सन्तानलाई अझैसम्म राज्यले नागरिकता प्रमाणपत्र दिन सकेको छैन, त्यसैगरी लाखौं मधेसीहरुलाई नागरिकता प्रमाणपत्र राज्यले प्रदान गरेको छैन’, यादवले सामाजिक सञ्जालमार्फत भनेका छन्, ‘यस्तो अवस्थामा निर्वाचन आयोगले नागरिकता प्रमाणपत्र नहुनेको नाम मतदातानमावलीमा समाबेश नगर्नु, मतदान गर्न पाउने अधिकारबाट बन्चित गर्नु , निर्वाचनको प्रक्रियामा सामेल हुन बाट रोक्ने कार्य असंवैधानिक हुनुका साथै अन्तराष्ट्रिय कानूनका विपरित र मानवता विरोधी कार्य हुन ।’

यादवका अनुसार लाखौं नागरिकले अहिले पनि नागरिकताको प्रमाणपत्र लिन पाएका छैनन् । नागरिकताको प्रमाणपत्र लिन नपाएका उनीहरुलाई मतदाता नामावलीमा समावेश नगर्नु गलत हुने उनको तर्क छ ।

उनले भनेका छन्, ‘नागरिकताको प्रमाणपत्र दिनु पर्ने दायित्व राज्यको हो, राज्यले आफ्नो जिम्मेवारी पुरा नगरेको तर त्यस्को सजाय जनताल्रे भोग्नु पर्ने यो कस्तो न्याय हो । तसर्थ सबै नेपाली नागरिकहरूको नाम मतदातानामवलीमा सामेल गर्नु पर्दछ। निर्वाचन आयोग र सरकारले यस्तो गम्भीर विषयमा समयमै ध्यान पूर्‍याओस् ।’

हाल नेपालमा नागरिकता प्रमाणपत्र लिएका १८ वर्षमाथिका व्यक्तिलाई मात्र निर्वाचन आयोगले मतदाता नामावलीमा समावेश गर्ने गरेको छ । मतदाता नामावलीमा नाम भएकाहरुले मात्र निर्वाचनमा मतदान गर्न पाउँछन् ।