Sansar News
काठमाडौं । सहमतिबाट नेतृत्व चयन गर्न गरिएको प्रयास असफल भएसँगै नेकपा (माओवादी केन्द्र)ले प्रदेश १ र बागमती प्रदेशको नेतृत्व चुनावी प्रक्रियाबाट चयन गर्ने भएको छ । प्रदेश कमिटी र केन्द्रको निर्देशन पनि लागु हुने अवस्था नभएपछि दुई प्रदेशमा नेतृत्व चयनका लागि चुनाव हुन लागेको हो ।
सहमति नबसेपछि अध्यक्ष पुष्पकमल दाहाल ‘प्रचण्ड’ चुनावी प्रक्रिया थाल्न निर्देशन दिइसकेका छन् । दुवै प्रदेशमा आगामी साताभित्रै चुनाव प्रक्रियाबाट नेतृत्व चयन गरिनेछ ।
प्रदेश १ र बागमतीमा आन्तरिक सहमति हुन नसक्दा अध्यक्षसहितका पदाधिकारीको टुंगो लाग्न सकेको छैन् । दुवै प्रदेशमा नेतृत्वका लागि आकांक्षीहरुको संख्या धेरै देखिएका छन् ।
माओवादी केन्द्रको प्रदेश १ मा अध्यक्ष पदका लागि मात्रै ६ जनाले दाबी पेश गरेका छन् भने बागमती पनि ४ जनाले दाबी पेस गरेका छन् । प्रदेश १ मा नेताहरु हर्कबहादुर लावती, शिवकुमार डाँगी, हेम कार्कीलगायतले पार्टी अध्यक्षको दाबी गरेका छन्भने बागमतिमा अध्यक्षको दौडमा दीनानाथ गौतम, सरल सहयात्री, डीपी ढकाललगायतका नेताहरु छन् ।
पछिल्लो समय प्रदेश प्रमुख बनेसँगै आगामी समय मुख्यमन्त्रीको स्वतः दाबेदार बन्न पाइने मनोविज्ञानका कारण नेताहरु प्रदेश अध्यक्षका लागि हानथापमा देखिएका हुन् । बताइएअनुसार केन्द्रभित्र देखिएको गुटहरुको प्रभाव पनि प्रदेशमा पर्दा नेतृत्व चयनमा सकस देखिन थालेको छ ।
वि.सं.२०७८ पुस ५ सोमवार ११:३० मा प्रकाशित
