Sansar News
काठमाडौं । प्रधानमन्त्री शेरबहादुर देउवा पुसको अन्तिम साता भारत भ्रमणमा जाने भएका छन् । पुस २६ देखि २८ सम्म हुने भाइब्रेन्ट गुजरात समिटमा सहभागी हुन देउवा भारत जान लागेका हुन् ।
उक्त सम्मेलनको भारतीय प्रधानमन्त्री नरेन्द्र मोदीले उद्घाटन गर्ने कार्यक्रम छ । गुजरात भारतीय प्रधानमन्त्री मोदीको गृहप्रदेश समेत हो। मोदी गुजरातको मुख्यमन्त्री भएका बेलादेखि नै उक्त सम्मेलन आयोजना गर्न थालिएको थियो।
परराष्ट्र मन्त्रालय स्रोतका अनुसार भारतको तर्फबाट देउवाको भ्रमणका लागि प्रस्ताव आएको र नेपाली पक्ष सकारात्मक देखिएको छ । प्रधानमन्त्री देउवाले पनि परराष्ट्र मन्त्रालयलाई भ्रमणको तयारीबारे गृहकार्य गर्न निर्देशन दिइसकेका छन् ।
गत असारमा पाँचौंपटक प्रधानमन्त्री भएपछि देउवाको यो दोस्रो विदेश भ्रमण हो । देउवा यसअघि बेलायतको ग्लास्गो सहरमा भएको कोप–२६ मा नेपालको उच्चस्तरीय प्रतिनिधि मण्डलको नेतृत्व गर्दै गएका थिए ।
वि.सं.२०७८ पुस ९ शुक्रवार १७:२६ मा प्रकाशित
