Sansar News
काठमाडौं । नेकपा (माओवादी केन्द्र)को आठौं महाधिवेशनअन्तर्गको जारी बन्दसत्रमा पार्टी अध्यक्ष पुष्पकमल दाहाल ‘प्रचण्ड’को प्रतिवेदन र नेता देव गुरुङ्गले प्रस्तुत गरेको विधान मस्यौदामाथि छलफल जारी छ । प्रतिवेदन र मस्यौदामाथि मंगलबार विभिन्न २५ वटा समूहले समूहगत सुझाब राखिरहेका छन् ।
प्रतिवेदन र विधानमाथि राखिएका सुझाबमा हरेक तहका कमिटीहरुमा प्रमुख कार्यकारी पदमा बढीमा दुई कार्यकालभन्दा बढी बस्न नपाइने व्यवस्थाको माग गरिएको छ । समूहगत सुझाबका रुपमा प्रतिनिधिहरुले विधानमै स्पष्ट रुपमा दुई कार्यकालको व्यवस्थालाई उल्लेख गर्नुपर्ने माग गरेका छन् ।
सुदूरपश्चिम प्रदेशको तर्फबाट बन्दसत्रमा सुझाब पेस गर्दै मीनबहादुर कुँवरले पार्टी सँगसँगै सरकारको कार्यकारी पदमा पनि दुई कार्यकालभन्दा बढी बस्न नपाउने व्यवस्था लागु गर्न माग गरे ।
जिम्मेवार नेताहरुको कार्य प्रगति मुल्यांकन गर्ने व्यवस्था पनि हुनुपर्ने नेताहरुको माग छ । जसलाई स्पष्ट रुपमै विधानमा व्यवस्था गर्न माग गरिएको छ ।
वि.सं.२०७८ पुस १४ बुधवार १७:१० मा प्रकाशित
