Sansar News
काठमाडौं । नेकपा (माओवादी केन्द्र) को जारी आठौं महाधिवेशनको बन्दशत्रमा अध्यक्ष पुष्पकमल दाहाल ‘प्रचण्ड’को राजनीतिक दस्तावेजमाथि गरिएको छलफलको निष्कर्ष सुनाउने क्रम जारी छ ।
अध्यक्ष प्रचण्डले सोमबार प्रस्तुत गरेको राजनीतिक प्रतिवेदनमाथि मंगलवारदेखि २५ समुहका प्रमुखले छलफलको निष्कर्ष सुनाउने क्रम जारी रहेको छ ।
मंगलवार सल्लाहकार समूहका प्रमुख रामनारायण बिडारी, प्रदेश नं. २ बाट सत्यनारायण भगत, आयोगको तर्फबाट टंक राई, गण्डकी प्रदेशबाट गायत्री गुरुङ, प्रदेश नं. १ बाट अजम्बर काम्वाङ राई र हर्कबहादुर नेम्बाङ, प्रवास समन्वय समितिबाट मनऋषि धिताल, बागमती प्रदेशबाट सरल सहयात्री, केन्द्रीय विभागबाट गीता पनेरु, सुदूरपश्चिम प्रदेशबाट मिनबहादुर कँवर र कर्णाली प्रदेशबाट विमला केसीले समूहको निष्कर्ष प्रस्तुत गरेका थिए ।
त्यसैगरी आज बिहान ११ बजेदेखि सुरु भएको बन्द सत्रमा बाँकी रहेका समूहले समूहगत छलफलको निष्कर्ष प्रस्तुत गरिरहेका छन् । समूहगत छलफलको निष्कर्ष प्रस्तुतपछि पार्टीको नयाँ नेतृत्व चयनका लागि निर्वाचनको तालिका सार्वजनिक गरिने निर्वाचन आयोगका अध्यक्ष विष्णुपुकार श्रेष्ठले जानकारी दिएका छन् । उनका अनुसार निर्वाचन आयोग निर्वाचन गराउनका लागि तयारी अवस्थामा रहेको छ ।
वि.सं.२०७८ पुस १५ बिहीवार १२:०७ मा प्रकाशित
