हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी र विवेकशील साझा पार्टीबीच पार्टी एकताको लागि औपचारिक रुपमै छलफल सुरु भएको छ । राप्रपा अध्यक्ष राजेन्द्र लिङ्देन र विवेकशील साझाका अध्यक्ष रवीन्द्र मिश्रले शुक्रबार पहिलो पटक पार्टी एकताबारे औपचारिक छलफल गरेका हुन् ।

छलफलको सकारात्मक सुरुवात भएको भन्दै निकट भविष्यमै सहकार्यको सम्भावना रहेको शुक्रबारको छलफलमा सहभागी राप्रपा नेता डा. धवलशमशेर राणाले बताए । पार्टीका एजेण्डा उस्तै–उस्तै भएको कारण एकता गरेर अगाडि बढ्दा समस्या नहुने निष्कर्ष दुवै पक्षको रहेको राणाले सञ्चार माध्यमलाई सुनाएका छन् ।

लिङ्देनसँगको छलफलबारे सामाजिक सञ्जालमार्फत मिश्रले पनि निकै आशाजनक संवाद भएको बताएका छन् । उनले लिङ्देनसँग ‘राजनीतिसँगै राजकाज संवाद’ भएको बताएका छन् ।

‘बिहानी पाहुनासँग ‘राजनीतिसँगै राजकाज’ संवाद १ आज बिहान चियासँगै राप्रपाका नवनिर्वाचित अध्यक्ष राजेन्द्र लिङ्देन तथा महामन्त्री धवलशमशेर राणासँग राजनीति, समाज र यो देशको भविष्यबारे चिन्तापूर्ण तर आशाजनक संवाद भयो । दुबैप्रति आभारी छु’, उनले फेसबुकमा लेखेका छन् ।

मिश्रले हालै ‘विचारभन्दा माथि देश’ नामको दस्ताबेज बाहिर ल्याएका थिए । जसमा उनले गणतन्त्र, संघीयताको र हिन्दूराष्ट्रबारे जनमत संग्रह गर्नुपर्ने माग गरेका छन् । उनको दस्तावेजलाई विवेकशील साझाले पनि स्वीकार गरेको छ ।

मिश्रको दस्तावेज राप्रपाको नीतिसँग मिल्ने भएका कारण पनि दुवैलाई एकताबद्ध भएर अगाडि जान सहज देखिन्छ । दस्तावेज सार्वजनिक गरेसँगै मिश्रलाई यसअघि पनि अन्य दुई राजावादी समूहसँग एकता गरिसकेका छन् ।