हामी सबैकाे संसारन्यूज

काठमाडौं । संस्कृति, पर्यटन तथा नागरिक उड्डयन मन्त्री प्रेम आलेले निलम्बनमा परेका पर्यटन बोर्डका प्रमुख कार्यकारी अधिकृत धनन्जय रेग्मीबाट संस्था नचल्ने बताएका छन् ।

पर्यटन बोर्डको स्थपना दिवसका अवसरमा बोल्दै मन्त्री आलेले बोर्डका सिइओ रेग्मीलाई साँढेको संज्ञा दिँदै उनीबाट कुनैपनि हालतमा संस्था चल्न नसक्ने बताएका छन् ।

पर्यटन बोर्डका कर्मचारीहरुको उपस्थित रहेको उक्त कार्यक्रममा बोल्दै मन्त्री प्रेम आलेले भने–‘यस्तो साँढेलाई हामीले सिइओ बनाउँदैमा संस्था चल्छ ? तपाईहरुका मागका विषयमा तपाईहरुको बीचमा छलफल हुँदा पनि यस्तो गर्नु हुँदैन संस्था डुब्छ धरासायी हुन्छ भनेर भन्दा, ल तपाई आज धेरै रिसाउनु भएछ जाउँ हिड्नु्स् खान भन्ने खालको त्यस्तो साँढेलाई ल्याएर सिइओ बनाउँदा संस्था चल्छ ?’
उनले लन्डनमा आयोजित कार्यक्रममा जाँदा ६ बजे कार्यक्रम भनिए पनि साढे सातबजे कार्यक्रम सुरु भएको र आफुलाई डेढ घण्टा उभिन परेको बताए ।

‘डेढ घण्टा म त्यहाँ उभिए । चिसो छ । सबैले स्याम्पेन खाइरहेका छन् । नखाने मान्छे साइडमा उभिइरहेको छु । हाम्रो त्यो साँढेले भटाभट लगाइरहेको छ । आफ्नै आँखाले देखिरहेको छु । मलाई पनि अझै खाँ भन्छ हेर्नुस् । उसले पहिलेको मन्त्री जस्तो ठान्यो होला ।’

मन्त्री आलेले आफ्ले चारवटा टोयोटा गाडी बेचेको जस्तो मन्त्री आलेलाई खरिद गर्छु भन्ने नसोच्न चेतावनी समेत दिएका थिए ।

उनले बोर्डका राष्ट्रसेवक कर्मचारीहरु सबैप्रति आफ्नो सम्मान रहेको भन्दै आफ्नो इमान बेचेर मन्त्रीको कुर्सीमा नबस्ने समेत बताए ।

‘मैले मलाई सहयोग गर्नुपर्यो । मेरो पार्टी यस्तो भनेर कसैलाई भनेको छैन । भन्ने वाला पनि छैन । कसैलाई पनि एक्सक्युज गर्ने समय छैन । त्यो मलाई पनि छैन । सबै उत्तरदायि भएर आफ्नो जिम्मेवारी बहन गर्नुपर्छ ।’

उनले नेपाल एरलाईन्समा भएको बेथितिप्रति इंगित गर्दै एयरलाईन्सको हालत कहाँ नटबल पाइन्छ, कहाँ टायर पाइन्छ बेचेरै खान पाए हुन्थ्यो भन्ने धन्दामा रहेको आरोप समेत लगाए । उनले यस्ता बिकृतिहरुलाई सम्हाल्न आफ्लाई गाह्रो भएको समेत बताए ।