हामी सबैकाे संसारन्यूज

काठमाडौं । नेपाल विद्युत् प्राधिकरणका प्रमुख कार्यकारी निर्देशक कुलमान घिसिङले काठमाडौं उपत्यकामा देखिएको झ्याप्प झ्याप्प विद्युत जाने समस्या छिट्टै समाधान हुने बताएका छन् । शुक्रबार विद्युत आपूर्तिमा देखिएको समस्याबारे पत्रकार सम्मेलन गर्दै उनले यस्तो दाबी गरेका हुन् ।

घिसिङका अनुसार काठमाडौं उपत्यकामा विद्युतको खपत यसअघि भन्दा धेरै गुणा बढेकाले ट्रान्सफर्मरमा समस्या आउँदा विद्युत आपूर्तिमा समस्या देखिएको हो । जुन समाधान उन्मुख रहेको उनले सुनाए ।

‘विगत ३/४ दिनदेखि विद्युत् आपूर्तिमा केही समस्या देखियो भन्ने जनगुनासो आयो, यो समस्या देशभित्र सबैतिर भएको समस्या होइन, काठमाडौंमा मात्रै हो, यो सप्लाइको कारणले भएको समस्या होइन’, पत्रकार सम्मेलनमा घिसिङले भनेका छन्, ‘अहिलेको मेजर समस्या वितरण ट्रान्सफर्मर ओभरलोड भएको हो, लोडअनुसार हामीले ट्रान्सफर्मर फेर्ने काम गरिरहेका छौँ, केही फिडरमा पनि आगलागी भयो, केही स्थानमा भने ट्रान्सफर्मरपछि पनि केवल घरमा जान्छ, त्यसमा आगलागी भएकोले फेर्दा समस्या आएको हो ।’

उनले विद्युत सप्लाई नपुगेर बत्ती जाने समस्या नभएको स्पष्ट पार्दै जति डिमान्ड आए पनि सप्लाई गर्ने स्थितिमा रहेको बताए । आजसम्म उपत्यकामा ट्रान्सफर्मरहरु परिवर्तन गरिसक्ने भएकाले विद्युत जाने समस्या नहुने उनको दाबाी छ ।

उनले काठमाडौं उपत्यकामा अब ९ वटा सबस्टेशन थपिँदै भएकोले उक्त सबस्टेशन बनिसकेपछि दीर्घकालीन रूपमा उपत्यकामा २ हजार मेगावाटको विद्युत सप्लाई गर्न सक्ने बताए ।