काठमाडौं । पशुपति धर्मशाला सञ्चालनका लागि बतास समूहसँग गरिएको सम्झौता रद्द गर्न छानबिन समितिले सिफारिस गरेको छ । सोमबार मन्त्रालयमा आयोजित पत्रकार सम्मेलनमा पर्यटन सचिव महेश्वर न्यौपानेले बतास समूहसँग भएको सम्झौता गैरकानूनी र मिलेमतोमा भएको ठहरसहित रद्द गर्न सिफारिस गरेको बताए ।
छानबनि समितिले बतास समूहसँग गरिएको सम्झौता नियम र प्रचलित कानून बमोजिम नभएको ठहर गरेको छ । ठेक्का सम्झौतामा सहभागि कोषका कर्मचारी र पदाधिकारीलाई समेत कारबाही गर्न समितिले सिफारिस गरेको छ ।
धर्मशाला निर्माण गर्दा सम्झौता भएबमोजिम बेडको संख्या र दररेट फरक बनाइएको, कोषलाई बुझाउनुपर्ने करिब एक वर्षको भाडा नबुझाएको, धर्मशालामा स्वीकृति बेगर भौतिक संरचनाहरु बनाउँदै विभिन्न अफिसहरु खडा गरेको निष्कर्ष छानबिन समितिको छ ।
समितिले सम्झौता रद्द गर्नुको विकल्प नभएको प्रष्ट पारेको छ । छानबिन समितिको यो निष्कर्षसँगै पशुपतिबाट पनि बतास समूह बाहिरिने स्पष्ट भएको छ ।
यसअघि नारायणहिटी दरबार संग्राहलयमा सम्झौता विपरितका कामहरु गरेको पाइएपछि पर्यटन मन्त्रालयले सम्झौता खारेज गर्दै ठाउँबाट समेत बतास समूहलाई हटाउने निर्णय गरेको थियो ।
वि.सं.२०७८ माघ ३ सोमवार १६:४६ मा प्रकाशित