हामी सबैकाे संसारन्यूज

काठमाडौं । एमसीसीको कारण सत्ता गठबन्धन गम्भीर संकटमा फसेको छ । एमसीसी पारित नगरी नछाड्ने लाइनमा प्रधानमन्त्रीसमेत रहेका कांग्रेस सभापति शेरबहादुर देउवा लागेसँगै गठबन्धन गम्भीर संकटमा फसेको हो । उच्च स्रोतले बताएअनुसार गठबन्धन जुनसुकै बेला पनि विघटन हुने अवस्थामा पुगेको छ ।

“प्रधानमन्त्री जी जसरी पनि एमसीसीलाई अगाडि बढाउनुपर्ने अडानमा उभिनुभयो, जुनसुकै मुल्यमा एमसीसी पारित गर्ने लाइनमा देखिन भएको छ”, माओवादीका एक उच्च नेताले भनेका छन्, “यस्तो अवस्थामा माओवादी र एकीकृत समाजवादी सरकारबाट जुनसुकै बेला बाहिरिने अवस्था छ, जुनसुकै बेला गठबन्धन भत्किन सक्छ ।”

अहिले देउवाले सत्ता साझेदार दलसँग मात्रै होइन प्रमुख प्रतिपक्षी एमालेसँग पनि छलफल बढाइरहेका छन् । बुझिएअनुसार देउवाले एमाले अध्यक्ष केपी शर्मा ओलीलाई आफ्नो नेतृत्वको सरकारलाई सहयोग गर्न प्रस्ताव नै पठाएका छन् ।

स्रोतले बताएअनुसार देउवाको प्रस्तावमा अध्यक्ष ओलीले सर्तसहित सहयोग गर्ने आश्वासन दिएका छन् । ओलीले सभामुख अग्निप्रसाद सापकोटालाई हटाउने विषयमा सहमत हुनुपर्ने सर्त राखेको बुझिएको छ । ओलीले सापकोटालाई नहटाई एमसीसी अगाडि बढ्न नसक्ने सन्देश देउवालाई पठाएका छन् । बुझिएअनुसार एमालेले सभामुखविरुद्व महाभियोगको प्रस्ताव नै तयार गरिसकेको छ ।

तर, देउवाको शैलीले कांग्रेसभित्रै विवाद बढ्यो

गठबन्धन नै भत्काउने तयारी भएसँगै भने देउवाको शैलीप्रति कांग्रेसभित्रै तिव्र असन्तुष्टी बढेको छ । सत्ता गठबन्धनको उच्चस्तरीय समन्वय समितिका संयोजक रामचन्द्र पौडेल नै देउवाको शैलीप्रति विरोधमा उत्रिएका छन् । उनले कुनै हालत गठबन्धन टुटाउन नहुने अडान राखेको बुझिएको छ ।

पौडेलसँगै अन्य नेताहरुले पनि गठबन्धन विभाजन गरेर ओलीसँग मिल्न नहुने भन्दै विरोध गरेका छन् । नेताहरुले ओलीले पटक–पटक धोका दिएको भन्दै सहकार्य गर्ने विषय सहज नभएको बताएका छन् ।

साथै, नेताहरुको चिन्ता एमालेसँग मिल्दा जनमतमै असर हुने भन्ने छ ।