हामी सबैकाे संसारन्यूज

काठमाडौं । नेकपा (एमाले) नेता भीम रावलले प्रधानमन्त्री शेरबहादुर देउवा र पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमसीसी पारित गर्ने भनेर लेखेको पत्रबारे संसदीय समितिले छानबिन गर्नुपर्ने माग गरेका छन् ।  अन्तर्राष्ट्रिय सम्बन्ध समितिको बैठकमा बोल्दै रावलले देउवा र प्रचण्डको पत्रले नेपालको कूटनीति कमजोर बनाएको बताए ।

“प्रधानमन्त्री देउवा र पूर्वप्रधानमन्त्री पुष्पकमल दाहाल ‘प्रचण्ड’ले संयुक्त रूपमा लेखेको पत्र हो, यो अन्तर्राष्ट्रिय सम्बन्ध समितिको विषय बन्नुपर्छ, प्रधानमन्त्री र पूर्वप्रधानमन्त्रीले यस्तो पत्र लेखेर यो सम्झौता अनुमोदन गर्नेछौं समय दिनुपर्‍यो भन्नुभएको छ, एमसीसी सम्झौताको सम्बन्धमा नेपाली जनतालाई जानकारी गराउनका लागि सरकारी स्रोत उपयोग गर्नेछौं भनेर लेखेपछि नेपालको कूटनीतिक सम्बन्ध कता गयो ?” उनले भने, “कूटनीतिमा यस्ता गतिविधिले राष्ट्रको स्वाभिमान झुक्ने काम भएको छ, अरु देशमा यस्तो भयो भने छानबिनमात्रै होइन‚ दण्डित हुन्थ्यो ।”

उनले देउवा र प्रचण्डले लेखेको पत्रबारे छानबिन गरेर कारबाही गर्नुपर्ने बताए । “प्रतिनिधिसभामा दर्ता गरिएको सम्झौता यस्तो र उस्तो गर्छौं भन्ने अधिकार उहाँहरूसँग हुन्छ ? यसमाथि छानबिन भएर कारबाही हुनुपर्छ, तबमात्र कूटनीतिक क्षेत्रमा राम्रो सन्देश जान्छ ।”