हामी सबैकाे संसारन्यूज

काठमाडौं । नेपाली कांग्रेसका नेता डा. शेखर कोइरालाले अमेरिकी सहयोग परियोजना एमसीसीलाई राजनीतिक मुद्दा बनाउन नहुने बताएका छन् । कांग्रेसको केन्द्रीय कार्यसम्पादन समितिको बैठकमा मन्तव्य राख्दै उनले अनुदान परियोजनामाथि सस्तो लोकप्रियताका लागि राजनीतिक रंग दिइएको निष्कर्ष सुनाए ।

“बहुचर्चित अमेरिकी सहयोग एमसीसी परियोजना अब सहयोग र अनुदानमा मात्रै सिमित रहेन, यो बिषय निकै माथी उठिसक्यो, यसप्रति हामी निकै गम्भीर बन्नु पर्ने परिस्थिति छ, यो परियोजनासँगै हाम्रो कुटनीतिक कौशलता र देशलाई नेतृत्व दिने क्षमता जोडिन्छ भन्ने मलाई लाग्दछ”, उनले भने, “नेपालको विकासका लागि आएको अनुदानलाई बिभिन्न रङ्ग दिएर अहिले भइरहेको राजनीति सस्तो लोकप्रियताका लागि हो भन्ने मेरो ठहर छ ।”

कोइरालाले एमसीसीमा संसदीय प्रक्रियामार्फत निकास खोज्नुपर्ने बताए । एमसीसी फिर्ता पठाउँदा गठबन्धन सरकार र पार्टीकै क्षमतामाथि गम्भीर प्रश्न उठ्ने उनको भनाई छ ।

उनले अघि भनेका छन्, “एमसीसीलाई सम्भव भए राजनीति दलहरु बीचको सहमतिबाट, नभए सार्वभौम संसदमा संसदीय प्रकृयामार्फत यथाशीघ्र निकास दिनुपर्छ । यदि एमसीसीबारे गठबन्धनमा सहमति नजुट्ने र संसदीय प्रकृयामा पनि लान नदिने हो भने अहिलेको गठबन्धन, सरकार, हाम्रो पार्टी र संसदको क्षमतामाथि नै गम्भीर प्रश्नहरु तेर्सिने देख्दैछु ।”