हामी सबैकाे संसारन्यूज

काठमाडौं । प्रधानन्यायाधीश चोलेन्द्र शमशेर राणाविरुद्व अप्रत्यासित महाभियोग दर्ता भएसँगै राष्ट्रिय राजनीति तरंगीत बनेको छ । सत्ता गठबन्धनले महाभियोगको ‘फायर’ प्रधानन्यायाधीशबाट खोलेसँगै अन्य संवैधानिक निकायमा पनि त्यसको प्रभाव पर्नसक्ने देखिएको छ ।

प्रधानन्यायाधीश राणाविरुद्व गठबन्धनले महाभियोग दर्ता गरेसँगै प्रमुख प्रतिपक्षी नेकपा (एमाले)ले पनि सभामुख अग्निप्रसाद सापकोटाविरुद्व महाभियोगको प्रस्ताव ल्याउने तयारी गरेको छ । एमालेका एक सांसदले बताएअनुसार केन्द्रीय सचिवालय र संसदीय दलको बैठकपछि त्यस्तो निर्णय हुनसक्छ ।

एमालेले सभामुखविरुद्व महाभियोग दर्ता गर्न यसअघिदेखि नै तयारी गरिरहेको थियो । एमालेले सत्ता गठबन्धनकाे मुख्य दल नेपाली कांग्रेससँग प्रस्ताव नै गरेको थियो ।

सभामुखविरुद्व महाभियोग दर्ता भए श्रृंखलामा अन्य संवैधानिक अंग

यदि सभामुखविरुद्व एमालेले महाभियोग दर्ता गरेमा माओवादी केन्द्रको नेतृत्वमा राष्ट्रपति विद्यादेवी भण्डारीमाथि नै महाभियोग दर्ता हुनसक्ने सम्भावना छ । राष्ट्रपतिसँगै सत्ता गठबन्धनले क्रमशः एमाले नेतृत्वको सरकारले नियुक्त गरेका संवैधानिक निकायमाथि हमला गर्नसक्ने देखिन्छ ।

गठबन्धनले खोलेको महाभियोगको फायरले क्रमशः अन्य संवैधानिक अंगहरु पनि अछुतो रहने छैनन् । विश्लेषकहरु राष्ट्रिय सभा अध्यक्षसहित संवैधानिक निकायका पदाधिकारीहरु महाभियोगको तारोमा पर्नेछन् ।