हामी सबैकाे संसारन्यूज

काठमाडौं । जबरजस्ती एमसीसी अगाडि बढाइए सरकारबाट बाहिरिने माओवादी केन्द्रको निर्णयसँगै प्रधानमन्त्री शेरबहादुर देउवा पछि हटेका छन् । देउवा तत्काल एमसीसी टेबल नगर्न सहमत भएका छन् ।

माओवादी केन्द्रको संसदीय दलको बैठक लगत्तै अध्यक्ष पुष्पकमल दाहाल ‘प्रचण्ड’लाई देउवालाई भेट्न बालुवाटार पुगेका थिए । प्रचण्डसँगको छलफलमा देउवाले एमसीसीलाई तत्काल टेबल नगर्न सहमति जनाएका हुन् ।

देउवा सहमत भएसँगै एमसीसी आजको संसद बैठकमा टेबल नहुने भएको छ ।

देउवासँगको छलफलमा प्रचण्डले चुनाव पछाडि मात्रै एमसीसीबारे निर्णय गर्न सकिने बताएको बुझिएको छ । बताइएअनुसार प्रचण्डले एमसीसी संशोधनको लागि अमेरिकासँग थप छलफल गर्नुपर्ने पनि कुरा देउवासँग गरेका छन् ।

प्रचण्डको कुरा सुनेपछि प्रधानमन्त्री देउवा आजको संसद बैठकमा एमसिसी टेबल नगर्न सहमत भएका हुन्।

दुई नेताबीच भोली (बिहीबार) सत्ता गठबन्धनको बैठक बोलाउने पनि निर्णय भएको छ । गठबन्धनको बैठकमा एमसीसीको विषयमा थप छलफल हुनेछ ।

प्रधानमन्त्री शेरबहादुर देउवाले बुधबारका लागि बोलाइएको प्रतिनिधिसभाको बैठकमा एमसीसी टेबल गर्ने तयारी गरेका थिए । देउवाले मंगलबार कांग्रेस संसदीय दलको बैठककै बीचबाट सभामुख अग्निप्रसाद सापकोटालाई फोन गर्दै एमसीसीलाई बैठकको एजेण्डा बनाउन आग्रह गरेका थिए ।

तर, राष्ट्रिय सहमति नभई अगाडि बढाउन नसक्ने अडान राख्दै आएका सभामुखले संसद बैठकको सम्भावित कार्यसूचीमा एमसीसीलाई पारेका थिएनन् । देउवाको एकोहोरो दबाब पछि बुधबारको कार्यव्यवस्था समितिको बैठकबाट एमसीसीबारे निर्णय गर्ने तयारी गरिएको थियो । तर, माओवादी निर्णयसँगै एमसीसीको विषय तत्कालका लागि अलमलमा परेको हो ।

सम्बन्धित समाचार

एमसीसी जबरजस्ती अघि बढाइए सरकार छाड्ने माओवादी निर्णय

संसदीय दलको बैठकबाट बाहिरिएलगत्तै देउवालाई भेट्न बालुवाटार पुगे प्रचण्ड