हामी सबैकाे संसारन्यूज

काठमाडौं । एमसीसीको विषयमा सत्ता गठबन्धनभित्र खटपट चलिरहेका बेला सत्ता गठबन्धनको मुख्य दल नेपाली कांग्रेस भने प्रमुख प्रतिपक्षी एमालेसँग संवादमा जुटेको छ । कांग्रेस नेताहरुले एमालेका बिहीबार बिहानैदेखि एमालेका नेताहरुसँग संवाद गरिरहेका छन् ।

कांग्रेस नेता मिनेन्द्र रिजाल एमाले अध्यक्ष केपी शर्मा ओलीलाई भेट्न बिहीबार बिहान ९ बजे ओली निवास बालकोट पुगेका थिए । ओलीका प्रेस संयोजक रामशरण बजगाईँका अनुसार उनीहरुबीच झण्डै एक घण्टा जति कुराकानी भएको थियो ।

रिजालले भेटेसँगै सञ्चारमन्त्रीसमेत रहेका कांग्रेस नेता ज्ञानेन्द्रबहादुर कार्कीले पनि ओलीसँग टेलिफोन संवाद गरेको बुझिएको छ । यता महामन्त्री गगन थापाले पनि नेताहरुसँग संवाद गरेको बुझिएको छ ।

सत्ता गठबन्धनभित्र एमसीसीले विवाद बढाएसँगै कांग्रेस प्रमुख प्रतिपक्षीसँग संवादमा जुटेको हो । गठबन्धनको दल माओवादी केन्द्र र एकीकृत समाजवादीले यथास्थितिमा एमसीसी अगाडि बढाइए सरकारबाट बाहिरिने निर्णय गरेका छन् । माओवादी र एकीकृत समाजवादीको निर्णयसँगै प्रधानमन्त्री शेरबहादुर देउवा वैकल्पिक गठबन्धन निर्माणमा जुटेको देखिएको छ ।

प्रतिपक्षी एमालेले सभामुख बर्हिगमनको विषयमा कांग्रेसले सहयोग गरे एमसीसी पारितमा सहयोग गर्ने बचन यसअघि नै देउवालाई दिएको थियो । एमसीसी पारित गर्न चौतर्फी दबाबमा परेका देउवाले सहयोगको बचन दिएको एमालेसँग संवाद बढाएका हुन् ।

आज बस्ने गठबन्धनको बैठकमा सहमति नभए एमालेसँग निर्णय गर्ने तयारी गरिएको कांग्रेसका नेताहरुले बताएका छन् । गठबन्धनको बैठकमा निर्णय नभई अगाडि नबढ्ने एक नेताले बताए ।