Sansar News
काठमाडौं । पाँच दलीय सत्ता गठबन्धनको बैठक सुरू भएको छ । अमेरिकी सहयोग नियोग मिलेनियम च्यालेन्ज कर्पोरेसन (एमसीसी)सँगको सम्झौताबारेमा निर्णय लिन गठबन्धनका शीर्ष नेताहरूको बैठक बसेको हो ।
बैठकमा प्रधानमन्त्री शेरबहादुर देउवासहित कांग्रेस वरिष्ठ नेता रामचन्द्र पौडेल, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका नेता बाबुराम भट्टराईलगायत गठबन्धनका शीर्ष नेताहरू सहभागी छन् ।
सरकार शुक्रबार तय भएको प्रतिनिधिसभा बैठकमा एमसीसी टेबल गर्ने तयारीमा छ । एमसीसी टेबल गर्ने विषयमा सहमति खोज्न बैठक बसेको हो ।
अहिले सत्ता साझेदार माओवादी केन्द्र र एकीकृत समाजवादी यथास्थितिमा एमसीसी अगाडि बढाउने पक्षमा छैनन् । तर, कांग्रेसले भने जसरी पनि एमसीसी अगाडि बढाउनुपर्ने अडान राखेको छ । गठबन्धनले बैठकले एमसीसीको बारेमा मात्रै नभई गठबन्धनकै भविष्यका विषयमा आज निर्णय गर्दैछन् ।
माओवादी केन्द्र र एकीकृत समाजवादीले जबरजस्ती एमसीसी अगाडि बढाइए सरकारबाट बाहिरिने निर्णय गरेका छन् भने कांग्रेसले प्रमुख प्रतिपक्षी एमालेसँग वैकिल्पिक गठबन्धन निर्माणको छलफल थालिरहेको छ ।
वि.सं.२०७८ फागुन ५ बिहीवार १७:५२ मा प्रकाशित
