हामी सबैकाे संसारन्यूज

काठमाडौं । नेकपा (एमाले) का अध्यक्ष केपी शर्मा ओलीले एमसीसीको विरुद्ध भएको जनप्रदर्शनको विरोध गरेका छन् । उनले प्रहरीमाथि प्रदर्शनकारीले ढुंगामुढा गरेको प्रति आक्रोश पोखे ।

सोमबार कालु पाँडेको समाधिस्थलमा आयोजित कार्यक्रममा बोल्दै ओलीले प्रहरी कुटिएको प्रति विरोध जनाए । प्रहरीलाई निर्धो बनाइएको भन्दै गृहमन्त्रीको विरोध गरे ।

“सरकारवालाहरुले नै सडकमा ढुंगा हान्न पठाएका छन्, कति खर्चमा बाटा बनाइएको थियो, क्रान्तिकारी सरकारमा हुनेहरुले बाटो भत्काएर ढुङ्गा निकालेर प्रहरीमाथी आक्रमण गरिरहेका छन्, नभत्काउ भन्ने कोही छैन, तोडफोड गरेका छन्”, ओलीले भनेका छन्, “प्रहरी कुटाइ खाएर भागेको छ, २५ जनाले ढुङ्गा हानेको छ, डेढसय सुरक्षाकर्मी छन् तर भाग्नु परेको छ ।”

उनले सत्तामा बस्नेहरुले दोहोरो भूमिका खेलिरहेको बताए । एमसीसी पारित नगर्ने षडयन्त्रअनुसार टेबल गरिएको बताए ।
प्रदर्शनको विषयमा आफुँले गृहमन्त्री बालकृष्ण खाँडलाई जिज्ञासा राखेको ओलीले बताएका छन् । उनले प्रहरीलाई निर्धो बनाइएको प्रति आफुँले प्रश्न गरेको बताए ।

उनले भनेका छन्, “मैले बिहान गृहमन्त्रीलाई सोधें–हिजो प्रहरीलाई के आदेश थियो ? किन १५ जनाले लुकेर ढुंगा हान्दा प्रहरीले केही गर्न सकेन ? प्रहरीका टाउका किन फुटे ?”