हामी सबैकाे संसारन्यूज

काठमाडौं । नेपाल विद्युत् प्राधिकरणका पूर्वकार्यकारी निर्देशक तथा उज्यालो पार्टी नेपालका अध्यक्ष कुलमान घिसिङले शिक्षा र स्वास्थ्य क्षेत्रमा लगाइएको ३ प्रतिशत समता शुल्क फिर्ता लिने सरकारको निर्णयको स्वागत गर्दै ५० युनिटभन्दा बढी विद्युत् खपतमा लगाइएको ५ प्रतिशत मूल्य अभिवृद्धि कर (भ्याट) पनि तत्काल खारेज गर्न सरकारसँग आग्रह गरेका छन्।

सामाजिक सञ्जालमार्फत धारणा सार्वजनिक गर्दै घिसिङले प्रधानमन्त्रीले निजी शिक्षण संस्था र निजी स्वास्थ्य सेवा प्रदायकमाथि लगाइएको ३ प्रतिशत समता शुल्क लागू नगर्ने घोषणा गर्नु सकारात्मक कदम भएको उल्लेख गरेका छन्। तर उक्त घोषणा सामाजिक सञ्जालमा मात्र सीमित नराखी आवश्यक कानुनी प्रक्रिया पूरा गरेर तत्काल कार्यान्वयनमा ल्याउनुपर्नेमा उनले जोड दिएका छन्।

घिसिङले ५० युनिटभन्दा बढी विद्युत् खपत गर्ने उपभोक्तामाथि लगाइएको ५ प्रतिशत करले स्वदेशमै उत्पादन भएको विद्युत खपतलाई निरुत्साहित गर्ने अवस्था सिर्जना गरेको र सो निर्णय स्वदेशी स्वच्छ ऊर्जाको अधिकतम उपयोग गर्दै आयातित इन्धनमाथिको निर्भरता घटाउने राष्ट्रिय लक्ष्यसँग यस्तो व्यवस्था कदापि मेल नखाने उल्लेख गरेका छन् ।

उनले भनेका छन् ‘शिक्षा समता शुल्क र स्वास्थ्य समता शुल्कलाई कानुनी रूपमा तत्काल खारेज गरी, विद्युत् खपतमा लगाइएको ५ प्रतिशत मूल्य अभिवृद्धि कर पनि फिर्ता लिन नेपाल सरकारसमक्ष हार्दिक आग्रह तथा गम्भीर ध्यानाकर्षण गराउँदछु।’