हामी सबैकाे संसारन्यूज

काठमाडौं । एमसीसी टेबल गराए पनि पारित गर्न गठबन्धनभित्र सहमति नजुटेसँगै प्रधानमन्त्री एवं कांग्रेस सभापति शेरबहादुुर देउवाले प्रमुख प्रतिपक्षी दल नेकपा (एमाले)सँगको संवादलाई तिव्रता दिएका छन् । आफैंले समेत पटक–पटक भेटेका देउवाले दूतहरुमार्फत थप संवादलाई अगाडि बढाएका छन् ।

एमाले अध्यक्ष केपी शर्मा ओलीसँग फागुन ५ को भेटपछि देउवाले एमसीसी टेबल गर्ने प्रक्रिया अगाडि बढाएका थिए । उनले ओलीलाई उनकै निवास बालकोट पुगेर भेटेका थिए ।

गठबन्धनभित्रको अन्तरविरोध र रस्साकस्सीबीच एमसीसी टेबल गराए पनि पारित गराउने पक्षमा सहमति नजुटेसँगै देउवाले पुनः ओलीसँगको संवादलाई तिव्रता दिएका हुन् । देउवाले बालकोट वार्ताको ६ दिनपछि मंगलबार साँझ ओलीलाई बालुवाटारमा नै बोलाएर ‘वान टु वान’ छलफल गरेका थिए ।

ओली र एमालेका शीर्ष नेताहरुसँगको वार्ता पछि बुधबार पनि देउवाले आफ्ना दूतहरुमार्फत ओलीसँगको संवादलाई अगाडि बढाएका छन् । बालुवाटारको छलफल पछि गृहमन्त्रीसमेत रहेका कांग्रेस नेता बालकृष्ण खाँडले बुधबार बालकोट पुगेर ओलीसँग छलफल गरेका छन् । जुन छलफल यसअघिको छलफलको निरन्तरता भएको नेताहरुले बताएका छन् ।

ओलीसँग सत्ता साझेदारीको प्रयास

कांग्रेस उच्च स्रोतले बताएअनुसार एमसीसीकै विषयले सत्ता गठबन्धन भत्किने अवस्था देखिएसँगै प्रधानमन्त्री देउवाले ओलीसँग सहकार्यको प्रस्ताव राखेका छन् । मंगलबारको बालुवाटार वार्ताले मूर्त रुप नलिएको कारण थप भेटवार्ता बढाइएको बताइएको छ ।

ओलीले माधवकुमार नेपालसहितका १४ सांसद र सभामुख हटाउने सहितका एजेण्डामा कांग्रेसले सहयोग गर्नुपर्ने प्रस्ताव राखेका छन् । बताइएअनुसार यी विषयमा मोटामोटी सहमति पनि बनिसकेको छ । तर, सहमतिलाई मूर्तरुप दिन देउवाले दूतहरुमार्फत थप छलफललाई अगाडि बढाएका हुन् ।

कांग्रेसका एक नेताले बताएअनुसार भोलीसम्म छलफलले मूर्त रुप पाउने छ । एमसीसीको विषयमा छलफल गर्न सभामुख अग्निप्रसाद सापकोटाले बिहीबारको लागि बैठक डाकेका छन् । बैठक अगाडि नै मूर्त सहमति गरिसक्ने प्रधानमन्त्री देउवाको तयारी छ ।