हामी सबैकाे संसारन्यूज

काठमाडौं । नेकपा (माओवादी केन्द्र)ले सरकारमा रहेका आफ्ना मन्त्रीहरुलाई फिर्ता बोलाउने तयारी गरेको छ । जसको लागि माओवादी केन्द्रका शीर्ष तहका नेताहरु शुक्रबार बिहानैदेखि पार्टी अध्यक्ष पुष्पकमल दाहाल ‘प्रचण्ड’को निवास खुमलटारमा छलफलमा छन् ।

बिहीबार प्रधानमन्त्री शेरबहादुर देउवा र माओवादी अध्यक्ष प्रचण्डबीच भएको छलफलमा आ–आफ्नो बाटो लाग्ने सहमति भएको थियो । देउवाले एमसीसी पारित गरेरै छाड्ने बताएका छन् ।

माओवादी नेताहरु देउवाको जवाफका आधारमा अब कसरी अगाडि बढ्ने भन्ने सन्दर्भमा छलफलमा जुटेका हुन् । नेताहरुबीच मन्त्री फिर्ता बोलाइ हाल्ने वा पर्खिने भन्ने विषयमा सहमति भइ नसकेको बुझिएको छ ।

एमसीसीसँगको सम्झौतालाई समर्थन नगर्ने निर्णय गरेकाले माओवादी केन्द्र, कांग्रेससँग अलग्गिनुपर्ने दबाबमा छ । उसले हिजै आफ्नातर्फका मन्त्रीलाई जुनसुकै बेला सरकार छोड्नुपर्ने भएकाले मानसिक रूपमा तयार रहन भनिसकेको बताइएको छ ।

यता माओवादी केन्द्रले मन्त्री फिर्ता बोलाउने तयारी गरिरहेका बेला कांग्रेस र एमालेका शीर्ष नेताहरु छलफलको तयारीमा छन् । सत्ता गठबन्धन भंग हुने सम्भावना बढीरहेको बेला दुई दल सघन छलफलमा छुटेका हुन् ।

दुई दलबीच एमसीसी अनुमोदनसँगै सरकारमा सहकार्य गर्ने विषयमा छलफल हुने बुझिएको छ । बिहीबार स्थगित संसद बैठक दिउँसो १ बजेदेखि बस्दैछ । बैठकमा कांग्रेस र एमाले एमसीसीको विषयमा साझा मत लिएर जाने तयारीमा छन् ।