हामी सबैकाे संसारन्यूज

काठमाडौं । नेकपा (माओवादी केन्द्र)को केन्द्रीय समिति बैठकको समय सारिएको छ। आइतबार बिहान ११ बजेका लागि तय भएको केन्द्रीय समिति ३ घण्टा पछि दिउँसो २ बजेका लागि सारिएको हो ।

आन्तरिक तयारी नपुगेकाले बैठक सारिएको नेता गणेश शाहले जानकारी दिएका छन् । उनका अनुसार पहिला केन्द्रीय समितिलाई पूर्णंता दिने पदाधिकारीको विषयमा प्रवेश गर्ने भन्नेमा दुविधा छ । नेताहरु सोही विषयमा छलफलमा जुटेको उनले बताए ।

साथै एमसीसी अनुमोदनको विषयमा देखिएको विवादमा पनि नेताहरुबीच छलफल भइरहेको छ । विशेषतः नेता नारायणकाजी श्रेष्ठ नेतृत्वको समूह एमसीसी अनुमोदनप्रति असन्तुष्ट छ । यसअघि शनिबार पनि दिनभर विवादका विषयमा छलफल चलिरहेको थियो ।

माओवादीको केन्द्रीय कमिटी बैठक शुक्रबारबाट सुरु भएको हो । आजको बैठकमा पार्टी अध्यक्ष पुष्पकमल दाहाल ‘‘प्रचण्ड’ले एमसीसीबारे उठेका प्रश्नको जवाफ दिने र अन्य कार्यसूचीमा प्रवेश गर्ने तयारी छ ।

आइतबार बैठकको अन्य अजेन्डामा केन्द्रीय कमिटीको पूर्णता, पदाधिकारी चयन, स्थायी र पोलिटब्युरो गठन गर्नेलगायत रहेको बताइएको छ।