हामी सबैकाे संसारन्यूज

काठमाडौं । नेकपा (माओवादी केन्द्र)को केन्द्रीय कमिटी बैठकमा अध्यक्ष पुष्पकमल दाहाल ‘प्रचण्ड’ले पार्टीमा देखिएको फरक मतमाथि स्थानीय तहको चुनावपछि मात्र छलफल गर्ने प्रस्ताव गरेका छन् । एमसीसी अनुमोदनको विषयलाई लिएर नेताहरुले राखेको फरक मतमाथि प्रचण्डले यस्तो प्रस्ताव गरेका हुन् ।

माओवादी केन्द्रभित्र एमसीसी अनुमोदनको विषयप्रति तिव्र असन्तुष्टि छ । नारायणकाजी श्रेष्ठलगायतका नेताहरूले एमसीसी अनुमोदनको विरोध गर्दै आएका छन् । उनीहरूले जारी केन्द्रीय कमिटी बैठकमा एमसीसी अनुमोदनको विषयमा फरक मत राखेका छन् ।

नेताहरुले राखेको फरक मतमाथि अहिले नै छलफल चलाउँदा सन्देश राम्रो नजाने भन्दै चुनावपछि छलफल गर्ने प्रस्ताव गरेका हुन् । प्रचण्डले पार्टी चुनावमा केन्द्रीत हुनुपर्ने भएको तर्क राखेका छन् ।

अध्यक्ष प्रचण्डले सोमबारको बैठकमा एमसीसी बारे नेताहरुले राखेको असहमति पत्र पार्टीको सम्पत्ति रहेको र यसलाई संरक्षण गरेर राखिने बताए। “यो विषयमा स्थानीय निर्वाचनपछि छलफल हुने छ”, उनले भनेका छन्, “पार्टीमा मतभेद हुनु सामान्य हो, मिलाएर जान सकिन्छ।”

केन्द्रीय समिति बैठक प्रस्तावित केन्द्रीय समिति सदस्यको नाम अनुमोदन गर्दै सम्पन्न गर्ने तयारी छ । पदाधिकारी चयनमा सहमति जुट्न नसकेपछि माओवादीभित्र तत्काल अध्यक्षलाई सघाउने टिमको निर्माण भने गर्ने तयारी गरिएको बुझिएको छ । जारी बैठकबाट उक्त विषयमा निर्णय गर्ने सम्भावना रहेको एक नेताले बताएका छन् ।