हामी सबैकाे संसारन्यूज

काठमाडौं । काठमाडौंकाविभिन्न कम्पनीमा जागिर लगाइदिने भन्दै चर्को शुल्क लिएर ठगी गर्ने युवाहरुको गिरोह पक्राउ परेका छन् ।

विभिन्न जिल्लाबाट आएर काठमाडौं उपत्यकाको विभिन्न स्थानमा जब सेन्टरहरु स्थापना गरी विभिन्न काममा जागिर लगाईदिने बहानामा प्रत्येक व्यक्तिबाट ३ सयदेखी रु ५ सयसम्म फारम चार्ज तथा १ हजारदेखि ६ हजारसम्म जब ग्यारेन्टि शुल्क लिने गरेको निवेदन आएपछि प्रहरीले उक्त गिरोहलाई पक्राउ गरेको हो ।

ठगीमा संलग्न रहेका अधिकांश युवाहरुको उमेर २२ देखि ४० वर्ष रहेको छ ।

प्रहरीको टोलीले काठमाडौंको कोटेश्वर, नयाँबानेश्वर, चाबहिल, बालाजु लगायतका स्थानबाट ठगिमा सक्रिय रहेका अर्घाखाँची घरभई भक्तपुर बस्ने सोसाइटी वेलफेयर फेसलिटिज म्यानेजमेन्ट सर्भिसका २६ वर्षीय अमर पाण्डे, तिलकराम पाण्डे, लमजुङ घर भइ बालाजुमा दुध पोखरी जब प्लेसमेन्ट एण्ड ट्रेनिङ सेन्टर संचालन गर्ने २२ वर्षीय आनन्द मरहठ्ठा, सिराहा घर भइ हाल कोटेश्वरमा बस्ने मल्टिप्रपोजप्रा.लिका संचालक २३ वर्षीय विवेक यादव, एबिएस जव एण्ड ट्रेनिङ सेन्टर संचालक ओखलढुंगा घर भइ कपनमा बस्ने २८ वर्षीय अश्विन राईलाई पक्राउ गरिएको हो ।

त्यसैगरी सिन्धुली घर भइ जडिबुटी बस्ने सिन्धु रोजगारी सेवाका सञ्चालक वर्ष २२ का घनश्याम पहाडी, रौतहट घर भई जडिबुटी बस्ने प्राश्ना जब ईन्टरनेशनल मल्टिप्रपोज प्रा.लि. की सञ्चालिका २५ वर्षीया सृजना लामिछाने, मोरङ घरभई कोटेश्वरमा क्विकमाण्डु एमपि प्रा.लिकी सञ्चालिका ४० वर्षीया ज्ञानु न्यौपाने, रौतहट घरभई कोटेश्वर बस्ने अनमोल जब मल्टिपल प्रा. लि.का सञ्चालक २२ वर्षीय रामवचन कुमार यादवलाई पनि प्रहरीले पक्राउ गरेको हो ।

उनीहरुल विभिन्न सामाजिक सञ्जाल, पत्रपत्रिका, प्रचारपम्पलेटका माध्यमबाट घरमै बसी जागिर मिल्छ भनि प्रचारप्रसार गर्ने, फारम भर्ने व्यक्तिहरुलाई विज्ञापनमा उल्लेखित शर्त बमोजिमको काममा नलगाउने तथा जागिरमा लगाई हाले पनि तोकिए बमोजिम तलब र सुबिधा नदिई केहि समयमानै उक्त जागिर छोड्न बाध्य बनाउने गरेको पाइएको छ ।

त्यसैगरी एक जब सेन्टरमा फारम दर्ता गरिसकेको व्यक्तिलाई तपाईको जागिर पक्का भईसकेको छ भनि त्यहाँबाट अर्को जब सेन्टरमा पठाई त्यहाँ समेत फारम शुल्क असुल्ने गरेको पाइएको छ ।