हामी सबैकाे संसारन्यूज

२९ फागुन, काठमाडौँ । न्यूजिल्याण्डमा जारी आईसीसी महिला एकदिवसीय विश्वकपमा अष्ट्रेलियाले लगातार तेस्रो जित हासिल गरेको छ । अष्ट्रेलियाले आफ्नो तेस्रो खेलमा न्यूजिल्याण्डलाई १४१ रनले पराजित गरेको हो ।

टस हारेर पहिले ब्याटिङ्ग गरेको अष्ट्रेलियाले ५० ओभरमा ८ विकेट गुमाएर २६९ रन बनाएको थियो । अष्ट्रेलियाका लागि ब्याटिङ्गमा एलिस पेरीले सर्वाधिक ६८ रन बनाएकी थिइन् । त्यसैगरी ताहलिया म्याकग्राले पनि ५७ रनको अर्धसतकीय पारी खेलेकी थिइन् । न्यूजिल्याण्डका लागि बलिङ्ग तर्फ भने ली ताहुहुले सर्वाधिक ३ विकेट हात पारेकी थिए ।

२७० रनको लक्ष्य पछाएको न्यूजिल्याण्डले पुरै ५० ओभर पनि ब्याटिङ्ग गर्न सकेन । न्यूजिल्याण्डको टिम ३०.२ ओभरमा १२८ रन बनाएर अलआउट हुन पुगेको थियो । न्यूजिल्याण्डका लागि एमी सेटरथवेटले सर्वाधिक ४४ रन बनाएकी थिइन् । अष्ट्रेलियाका लागि बलिङ्गमा भने डार्सी ब्राउनले सर्वाधिक ३ विकेट हात पारेकी थिए ।

जितसँगै अष्ट्रेलिय ३ खेलबाट ६ अकं जोड्दैँ अकं तालिकाको शिर्ष स्थानमा उक्लिएको छ भने न्यूजिल्याण्ड चौथो स्थानमा झरेको छ ।