हामी सबैकाे संसारन्यूज

माहे आइल्याण्ड, सेसेल्स । गैरआवासीय नेपाली संघ (एनआरएनए) सेसेल्सले सिसेल्स भ्रमणमा रहेका श्रम, रोजगार तथा सामाजिक सुरक्षामन्त्री कृष्ण कुमार श्रेष्ठको स्वागतमा एक कार्यक्रमको आयोजना गरेको छ ।

मार्च १८ देखि २० सम्मको तीनदिने सेसेल्स भ्रमणका क्रममा श्रममन्त्री श्रेष्ठले नेपाल र सेसेल्सबिचको दुइपक्षीय सम्बन्ध, श्रम सम्झौता र नेपाली श्रमिकहरुको हकहितका सम्बन्धमा यहाँका सरोकारवाला निकाय र सम्बन्धित मन्त्रालयका मन्त्रीसँग व्यापक छलफल भएको बताएका छन् ।

सिसेल्स भ्रमणको अन्तिम दिन एनआरएनए सेसेल्सले आयोजना गरेको स्वागत तथा भेटघाट कार्यक्रममा बोल्दै मन्त्री श्रेष्ठले बिदेशमा श्रम गरेर अर्थतन्त्र धान्ने नेपालीहरुको हकहित र सुरक्षाको लागि सरकार प्रतिबद्द रहेको बताए ।

मन्त्री श्रेष्ठले सेसेल्समा कार्यरत नेपालीहरुको लागि स्थानिय सो–सरह तलब–सुबिधा र सेवाको लागि पहल गर्ने, श्रम सम्झौताको लागि पहल गर्ने तथा सेसेल्समा अन्य पनि थुप्रै क्षेत्रमा रोजगारीको वातारण सिर्जना गर्नको लागि आवश्यक प्रक्रिया अगाडी बढाउने बताए ।

अबैधानिक तवरले अनावश्यक र अत्यधिक रकम असुलेर नेपालीलाई नेपालीले ठगी गर्ने गरेको दुःखद समाचार सुन्नु परेकोमा मन्त्रीले खेद प्रकट गर्दै आइन्दा त्यस्तो हुन नदिने आस्वासन समेत दिए । ‘अबदेखि कुनै पनि समस्या भए एनआरएनएमार्फत आधिकारिक रुपमा गुनासो लिएर श्रम मन्त्रालय सक्दो सहयोग गर्न सदैव तयार छ ।’

उक्त अवसरमा एनआरएनएले सिसेल्समा कार्यरत नेपालीहरुको खाइपाई आएको तलब सुबिधा घटेको, एउटै कम्पनीमा एकै प्रकृतिको काममा पनि असमान तलब रहेको, सेसेल्स सरकारले कामदारबाट मासिक रुपमा लिने आय कर तथा अबैधानिक रुपमा नेपालीले नेपालीलाई नै अधिकतम पैसा असुलेर ठगी गरेको लगायतका समस्या राखेका थिए ।

भ्रमण दलमा रहेका श्रम सचिव एकनारायण अर्याल, सहसचिव राजिव पोख्रेल, डा.थानेश्वर भुसाल र नेपालका लागि सेसेल्सका अवैतनिक वाणिज्यदुत नरेश दासको पनि उपस्थिति रहेको थियो ।

मन्तव्यका क्रममा बोल्दै सचिव अर्याल र वाणिज्यदूत दासले पनि सेसेल्समा रहेका नेपालीहरुको हकहित र समस्याका बारेमा सक्दो सहयोग गर्न तयार रहेको प्रतिबद्दता जनाए ।

सेसेल्सको माहे आइल्याण्डस्थित रोचे प्रशासनिक भवनको सभा–हलमा सम्पन्न उक्त कार्यक्रम एनआरएनए सेसेल्सका अध्यक्ष मनोज बिकको सभापतित्वमा सम्पन्न भएको थियो ।

कार्यक्रमको संचालन साहित्यकार तथा संस्थाका सल्लाहकार गणेश खड्काले गरेका थिए भने एनआरएनए सेसेल्स महिला उपाध्यक्ष खेसेना लिम्बुले स्वागत मन्तव्य राखेकी थिइन् । साथै संस्थापक अध्यक्ष आर पी पन्तले संस्थाको स्थापना र उपादेयतामाथि प्रकाश पारेका थिए ।

कार्यक्रम अवधिमा साहित्यकार गणेश खड्काले कविता सुनाउँदा उपस्थित सबैमा एकाग्रता छाएको थियो भने कार्यक्रमको अर्को आकर्षण खड्काकै शब्द रचनामा घरदेश र परदेशको कथा समेटिएको गीतको अडियो मन्त्री श्रेष्ठबाट सार्वजनिक गरिएको थियो ।