हामी सबैकाे संसारन्यूज

काठमाडौं । आगामी स्थानीयतहको निर्वाचनको आचारसंहिता पालना गर्ने विषयमा ७९ दलमध्ये ६५ दलले लिखित प्रतिबद्धता जनाएका छन् ।

निर्वाचन आयोगले आगामी बैशाख ३० गतेदेखि सुरु हुने स्थानीतहको निर्वाचनमा निर्वाचन आचारसंहिता पालना गर्ने विषयमा मंगलबार बोलाएको बैठकमा दलहरुले लिखित प्रतिबद्धता जाहेर गरेका हु्न् ।

आयोगले दलहरुबाट प्राप्त सुझावलाई समेत समेटेर ऐन, कानुन र संविधान अनुरुप बनाएर राजपत्रमा प्रकाशित भइसकेको अवस्थामा आचारसंहितामा हस्ताक्षर गर्न मंगलबार बैठक बोलाएको थियो ।

बैठकमा निर्वाचनमा भागलिने ७९ दलका प्रतिनिधिहरुको सहभागीता रहेको थियो । बैठकमा पुगेका केही राजनीतिक दलका प्रतिनिधिहरुले आयोगले छलफल विनै लिखित प्रतिबद्धतामा हस्ताक्षर गर्न लगाएको भन्दै आपत्ति जनाएका थिए ।

त्यस्तै बैठकमा भाग लिन पुगेका नेकपा एमालेका कानुन विभागका प्रमुख रमेश बडाल र निर्वाचन विभाग उपप्रमुख निरज आचार्यले बैठकमा तनाव र हो–हल्ला भएको भन्दै आफुहरुले हस्ताक्षर नगरी बैठकबाट बाहिरीएको बताएका छन् । उनीहरुले शान्त वातावरणमा सबै दलको विचार सुनुवाई हुने गरी अगाडि बढ्न आयोगलाई आग्रह समेत गरेका छन् ।

आयोगका प्रवक्ता शालिग्राम पौडेलले ७९ दलमध्ये ६५ दलले प्रतिवद्धता पत्रमा हस्ताक्षर गरेको बताए ।

‘७९ दल मध्ये ६५ दलले आचारसंहिता पालना गर्ने प्रतिबद्धतामा हस्ताक्षर गर्नु भएको छ,’ संसारन्युजसँग उनले भने, ‘केही दलका प्रतिनिधिहरु उपस्थित हुनुहुन्थेन । केही दलका प्रतिनिधिहरुले पछि आउँछौ भनेर बाहिर निस्कनु भयो । बैठकमा हो–हल्ला भएर होइन ।’