हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले गठबन्धनभित्र भागबन्डामा सहमति नजुटे आफ्नो पार्टी एक्लै चुनावमा प्रतिस्पर्धा गर्ने बताएका छन् । पार्टी मुख्यालयमा पेरिसडाँडामा सोमबार आयोजित पत्रकार सम्मेलनमा उनले महानगर, उपहानगरसहितमा उम्मेदवार छनोटमा गठबन्धनमा सहमति नभए माओवादी केन्द्र एक्लै चुनावमा लड्ने बताए ।

“यदि गठबन्धनभित्र सहमति भएन भने जस जसको बीचमा सहमति हुन्छ, त्यस त्यसको बीचमा सहमति गरेर हामी अगाडि जान्छौं”, प्रचण्डले भने, “कसैसँग भएन भने हामी एक्लै लड्छौं । हामी तीन महिनादेखि चुनावको तयारीमा छौं ।”

अध्यक्ष प्रचण्डले चुनावी माहोल माओवादी अनुकुल भएको पनि बताए । उनका अनुसार एक्ला एक्लै चुनाव लडे माओवादी पहिलो पार्टी बन्छ ।

प्रचण्डले सत्ता साझेदार दलहरुबीच सोमबार साँझ नै तालमेल गर्ने वा नगर्ने टुंग्याउने तयारी गरेको बताएका छन् । उनका अनुसार साँझ बस्ने बैठकले ६ महानगर र ११ उपमहानगरको बारेमा निष्कर्ष निकाल्ने छ ।