हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफुँहरुले भरतपुर महानगर नभई हुन्न नभनेको बताएका छन् । उनले ६ महानगरमध्ये माओवादीले कम्तिमा एक महानगर पाउनुपर्ने अडान राखेको स्पष्ट पारे ।

प्रचण्डले भरतपुरको साटो काठमाडौं वा विराटनगर भए पनि स्वीकार गर्ने बताए । “ भरतपुर नभई भएन भनेको छैन, रेनु नभई भएन भन्ने पनि अडान होइन”, पेरिसडाँडामा आयोजित पत्रकार सम्मेलनमा उनले भने, “६ वटा महानगरमा एउटा माओवादीलाई पर्ला, काठमाडौं वा विराटनगर भए पनि हामी तयार छौं ।”

उनले यसअघिको निर्वाचनको अवस्था र स्थानीय वस्तुस्थितिका आधारमा माओवादीले भरतपुर मागेको बताए । विरोध हुने विषय सामान्य भएको भन्दै उनले औपचारिक निर्णय भएपछि सबै साम्य हुने दाबी गरे ।

“भरतपुर दिन मोटामोटी सहमति गठबन्धनमा छ, कांग्रेसका केही नेताले मानेका छैनन् तर औपचारिक निर्णय भएपछि यस्ता विरोधले तात्विक फरक पर्दैन”, उनले भनेका छन् ।

प्रचण्डले गठबन्धनभित्र सहमति नभए माओवादी एकल रुपमै प्रतिस्पर्धा गर्न तयार रहेको पनि स्पष्ट पारेका छन् । उनले मिल्नेसम्म मिलेर जाने अन्यथा एकल रुपमै प्रतिस्पर्धामा जाने बताए ।