हामी सबैकाे संसारन्यूज

काठमाडौं । सत्तारुढ गठबन्धनका बीच महानगरपालिका भागवण्डामा सहमति जुटेको छ । गठबन्धनबीचको सहमतिअनुसार एकीकृत समाजवादीले पोखरा पाउने भएको छ ।

पोखराको विषयमा कांग्रेसभित्र तिव्र किचलो थियो । कांग्रेसभित्र पोखरा छाड्न नहुने मत बलियो थियो । तर, प्रधानमन्त्रीसमेत रहेका कांग्रेस सभापति शेरबहादुर देउवाले पोखरा छाड्न सहमति गरेका हुन् ।

उनी गण्डकी प्रदेशबाट आएका कांग्रेस नेताहरुसँगको छलफल पछि एकीकृत समाजवादीलाई दिन सहमत भएका थिए । देउवासँग छलफलका लागि गण्डकी प्रदेशका सभापति शुक्रराज शर्मा, पूर्व कानुनमन्त्री यज्ञ थापा र कास्कीका जिल्ला सभापति किशोरदत्त बराल बालुवाटार आएका थिए । नेताहरुले पोखराको पछिल्लो अवस्थाबारे देउवालाई ब्रिफिङ गरेका थिए ।

पोखराको विषयमा सहमति भएसँगै महानगरको बारेमा देखिएको विवाद पनि हल भएको छ । पाँच दलबीच यसअघि नै ५ महानगरको विषयमा सहमति भइसकेको थियो ।

दलहरुबीच भएको सहमतिअनुसार कांग्रेसले काठमाडौं, ललितपुर र विराटनगर महानगरपालिकाको मेयर पाउनेछ भने माओवादी, एकीकृत समाजवादी र जसपाले क्रमशः भरतपुर, पोखरा र वीरगञ्जको मेयर पाउनेछन् ।