हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले फेरि कम्युनिष्ट एकता हुने बताएका छन् । कैलालीको मसुरियामा बिहीबार आयोजित कार्यक्रमलाई सम्बोधन गर्दै उनले अहंकारी प्रवृत्तिको अन्त्य गरेर कम्युनिष्ट एकता हुने बताए ।

साविक नेकपा तीन टुक्रा र एमाले दुई टुक्रा हुने भएकाे बताउँदै उनले निरकुंश र अहंकारी प्रवृत्तिलाई आसन्न निर्वाचनबाट परास्त गरेर कम्युनिष्ट एकता हुने बताए ।

“यो प्रवृत्तिलाई यसपटक पूरै पराजित गर्नुपर्छ। मलाई के लाग्छ भने, अहिले परास्त गरेपछि फेरि वाम एकता हुनसक्छ। फेरि कम्युनिस्ट एकता हुन्छ। त्यो एकता माओवादीको नेतृत्वमा हुन्छ। प्रचण्डको नेतृत्वमा हुन्छ र मात्रै त्यो टिक्छ”, उनले भने ।

यसरी हुने कम्युनिष्ट तथा वाम एकता माओवादीको नेतृत्व हुने बताउँदै उनले यसको नेतृत्व आफूले लिने बताए । “माओवादी एक नम्बर कम्युनिस्ट पार्टी बन्ने बित्तिकै फेरि कम्युनिस्टहरुको बीचमा ध्रुवीकरण हुनसक्छ। वामपन्थी एकता हुनसक्छ। फेरि गठबन्धन नयाँ शिराबाट अगाडि बढ्न सक्छ”, उनले भने ।