हामी सबैकाे संसारन्यूज

काठमाडौं । निर्वाचनका दिन खोप सञ्चालन नहुने भएको छ । स्वास्थ्य तथा जनसङ्ख्या मन्त्रालयले आज एक विज्ञप्ती जारी गर्दै यही वैशाख ३० गते हुने स्थानीय तहको निर्वाचनमा कोरोना भाइरसविरुद्धको खोप अभियान नहुने जनाएको हो ।

मन्त्रालयले छिमेकी मुलुकमा पछिल्ला दिनमा सङ्क्रमण बढ्दै जाँदा नेपालमा पनि जोखिम बढ्ने सम्भावना भएकाले सर्तक रहँदै जनस्वास्थ्यका मापदण्ड अपनाउन आग्रह गरेको छ । निर्वाचन सम्पन्न गर्न मतदानास्थलमा स्वास्थ्यकर्मीहरु समेत परिचालन हुने र स्थानीय स्वास्थ्यकर्मीहरुले आफ्नो मताधीकार प्रयोग गर्नु पर्ने हुनाले अतिरिक्त खोप केन्द्र तथा नियमित खोप अभियान सञ्चालनमा कठिनाई हुने भएकाले सो दिन खोप सञ्चालन नहुने विज्ञप्तीमा उल्लेख गरिएको छ ।

मन्त्रालयले जारी गरेको विज्ञप्तीमा निर्वाचन अघि र पछिका दिनमा खोप केन्द्रमा नियमित खोप अभियान सञ्चालन हुने भएकाले सबैलाई सकेसम्म कोभिड१९ विरुद्धको खोप लगाउन अनुरोध गरिएको छ ।