Sansar News
काठमाडौं । बागलुङको तमानखोला गाउँपालिकाको अध्यक्षमा नेपाली कांग्रेसका जोकलाल बुढा निर्वाचित भएका छन् । बुढाले २ हजार ७०७ मत ल्याएर अध्यक्षमा पुनः निर्वाचित भएका हुन् ।
यसअघि पनि बुढा २०७४ सालको निर्वाचनबाट अध्यक्षमा निर्वाचित भएका थिए । तमानखोलामा कांग्रेस र माओवादीबीच प्रतिस्पर्धा भए पनि जिल्लाका अरु स्थानीय तहमा सत्तारुढ दलबीच चुनावी तालमेल भएको थियो ।
बुढाका प्रतिद्वन्द्वी नेकपा माओवादी केन्द्रका अध्यक्षका उम्मेदवार देवबहादुर पुनले १ हजार ९९५ मत प्राप्त गरेका छन् भने नेकपा एमालेका उम्मेदवार देवेन्द्र छन्त्यालले ३९२ मत प्राप्त गरेका छन् ।
गाउँपालिका उपाध्यक्षमा नेपाली कांग्रसकी हिरा कुमारी छन्त्याल २ हजार ७१९ मत प्राप्त गरी विजयी भएकी छन् । नेकपा माओवादी केन्द्रकी उपाध्यक्ष उम्मेदवार निसु रसाइलीले १ हजार ९५८ मत प्राप्त गरेकी छन् ।
वडाध्यक्षमा वड नम्बर १मा नेकपा माओवादी केन्द्रका थमबहादुर रोका, वडा नम्बर २मा नेकपा माओवादी केन्द्रका नारायण सुनार, वडा नम्बर ३मा नेपाली कांग्रेसका झकबहादुर बुढा, वडा नम्बर ४मा नेकपा माओवादी केन्द्रका छवि श्रीपाली, वडा नम्बर ५मा नेपाली कांग्रेसका हिराबहादुर श्रीपाली र वडा नम्बर ६मा कांग्रेसकै चित्र छन्त्याल निर्वाचित भएका छन् ।
वि.सं.२०७९ जेठ १ आइतवार १४:५२ मा प्रकाशित
