हामी सबैकाे संसारन्यूज

काठमाडौं । भारतीय प्रधानमन्त्री नरेन्द्र मोदी एक दिने नेपाल भ्रमणका क्रममा लुम्बिनी आइपुगेका छन् । उनी भारतीय वायु सेनाको हेलिकप्टरमार्फत बिहान साढे १० बजे भैरहवा ओर्लीएका थिए ।

विमानस्थलमा नओर्लिएका मोदी भैरहवामा उनका लागि निर्माण गरिएको हेलिप्याडमा ओर्लिएका थिए । मोदीलाई हेलिप्याडमै पुगेर प्रधानमन्त्री शेरबहादुर देउवाले स्वागत गरेका थिए ।

मोदी भैरहवा ओर्लिए लगत्तै सिधै मायादेवी मन्दिरतर्फ लागेका थिए । मोदीले नेपाल ओर्लिलगत्तै “बुद्ध जन्मस्थल आउन पाएकोमा खुसी भएको” भन्ने प्रतिक्रिया दिएका छन् ।

काठमाडौं ओर्लि लगत्तै उनले ट्विटरमा लेखेका छन्, “नेपाल आइपुगेको छु। बुद्ध पूर्णिमाको विशेष अवसरमा नेपालका अद्भूत जनताहरुमाझ हुन पाउँदा खुशी लागेको छ। लुम्बिनीमा हुने कार्यक्रमहरुमा सहभागी हुने अपेक्षामा छु।”

बुद्ध जयन्तीको अवसरमा एक दिने भ्रमणमा आएका मोदी गौतम बुद्धको पूजा, आराधना पछि छोटो राजनीतिक भेटवार्तासँगै स्वदेश फर्किने छन् । उनको आज साँझ ५ बजे स्वदेश फर्किने कार्यक्रम छ ।