हामी सबैकाे संसारन्यूज

काठमाडौं । नेकपा (एकिकृृत समाजवादी) पार्टीले पोलिटब्यूरो र केन्द्रीय कमिटीको बैठक बोलाएको छ ।

यहि असार १० र ११ गतेका लागि बोलाईएको उक्त बैठकमा स्थानीय निकायको निर्वाचनको समिक्षा तथा विभिन्न विषयमा छलफल हुने बताइएको छ ।

बैठकमा आगामी प्रतिनिधिसभा र प्रदेशसभाको निर्वाचनमा पार्टीलाई विजयी बनाउनका लागि देशैभरी संचालन गरिने कार्यक्रम, कार्ययोजना तथा आवस्यक रणनीति लगायतका विषयमा छलफल हुने बताइएको छ । साथै बैठकमा केन्द्रीय नेताहरुले आफ्नो क्षेत्र, प्रदेशमा संगठनको अवस्था, संगठन विस्तारको कार्ययोजना लगायतका विषयमा प्रतिवेदन पेश गर्ने तयारी रहेको समेत बताइएको छ ।

त्यस्तै आगामी निर्वाचनमा गठबन्धनभित्रै रहेर चुनावी तालमेल गर्ने वा गठबन्धनबाट बाहिरीएर आफ्नै शक्तिका आधारमा निर्वाचनमा होमिने हुने भन्ने विषयमा समेत छलफल गरिने बताइएको छ ।

यसअघि बैशाख ३० गते भएको स्थानीय निकायको निर्वाचनमा गठबन्धनभित्रका दलहरु तालमेल गरेर जाँदा पनि एकिकृत समाजवादीका लागि चुनावी परिणाम सकारात्मक नआएको भन्दै त्यसको गम्भीर समिक्षा गरिने बताउँदै आएको छ ।

त्यसैगरी असार १३ र १४ गते केन्द्रीय परिषद्को बैठक हुने पनि सो पार्टीले जनाएको छ ।