हामी सबैकाे संसारन्यूज

काठमाडौं । सरकारले आजबाट असार १५ गतेसम्म ५ वर्ष पूरा भई १२ वर्ष मुनिका बालबालिकालाई कोरोना भाइरसविरुद्धको फाइजर खोप दिँदैछ ।

पहिलो चरणमा देशका २७ जिल्लाका ७ देखि ११ वर्षसम्मका बालबालिकालाई खोप लगाइने स्वास्थ्य मन्त्रालयले जनाएको छ ।

मन्त्रालयका अनुसार उक्त खोप बालबालिका आफु अध्ययनरत विद्यालयमै लगाउने व्यवस्था गरिएको छ । साथै पहिलो मात्रा खोप लगाएका बालबालिकालाई साउन २ देखि ८ गतेसम्म दोस्रो मात्रा खोप लगाइनेछ ।

त्यसैगरी बाँकी रहेका ५० जिल्लामा भदौ ५ देखि ११ गतेसम्म पहिलो मात्रा र भदौ २७ देखि असोज १ गतेसम्म दोस्रो मात्राको खोप लगाइने तयारी रहेको पनि मन्त्रालयले जनाएको छ ।

मन्त्रालयका अनुसार पहिलो चरणमा खोप लगाउन लागिएको २७ जिल्लामा प्रदेश १ को झापा, इलाम, मोरङ्ग र सुनसरी, मधेश प्रदेशको सप्तरी, धनुषा, पर्सा, सिराहा, महोत्तरी, बागमतीको काठमाडौं, भक्तपुर, ललितपुर, काभ्रे, चितवन, सिन्धुली र मकवानपुर, गण्डकी प्रदेशको कास्की र नवलपरासीपूर्ज, लुम्बिनी प्रदेशको नवलपरासी पश्चिम, रुपन्देही, बाँके, दाङ, बर्दिया, कर्णाली प्रदेशको सुर्खेत तथा सुदूरपश्चिम प्रदेशको कैलाली, कञ्चनपुर र डडेल्धुरा गरी २७ जिल्लाका बालबालिकालाई लगाइने मन्त्रालयद्धारा जारी सूचनामा उल्लेखछ ।