हामी सबैकाे संसारन्यूज

तेह्रथुम । तेह्रथुमको छथर गाउँपालिकाले पालिकाभित्र संचालनमा रहेका सहकारी संस्थाहरूलाई नियमानुसार संचालित हुन कडाईका साथ निर्देशन गरेको छ ।

पालिकामा रहेका ४६ वटा सहकारी संस्थाहरू नियमित साधारणसभा नभएको, नियमित लेखापरिक्षण नगरेको, बिधान अनुसार संचालन नभएको, नियमित बैठक नबसेको, वचत तथा ऋण परिचालनमा अनियमितता देखिएकोले सहकारीहरूलाई कडाई गर्न लागिएको पालिका श्रोतले जनाएको छ ।

कार्यपालिकाको बैठकले निर्णय गर्दे गाउँपालिकाको सहकारी ऐन बमोजिम सहकारी तत्काल नियमित हुन आग्रह गर्दै पालिकाले अनुरोध गर्दा समेत नियमित नहुने सहकारीहरूलाई कार्वाहीको दायरामा ल्याउने पनि बैठकले निर्यण गरेको छ ।

त्यस्तै सहकारीमा ऋण लिएर बर्षाे नियमित नहुने, सहकारीको रकम हिनामिना गर्ने सहकारी सदस्यहरूलाई छथर पालिकाभित्र कुनै पनि सामाजिक संघ संस्थाहरूमा आवद्धता नगराउने कार्यपालिकाको निर्णय रहेको पालिका अध्यक्ष सन्तोष तिगेलाले जानकारी बताए ।

सहकारीमा गरिव परिवारका सदस्यहरूको सामुहिक पुँजी रहेकाले कुनै २÷४ जनाले हिसाव हिनामिना गर्न नहुने नियमानुसार संस्था संचालन हुनु पर्ने भएकाले यस्तो निर्णय लिएको अध्यक्ष तिगेलाले बताए ।

आ.व. ०७९/०८० को निति तथा कार्यक्रममा समेत सहकारीलाई नियमित अनुगमन, नियमन, क्षमताविकास लगायतको कार्यक्रम उल्लेख भएको छ ।