हामी सबैकाे संसारन्यूज

काठमाडौं । पछिल्लो एक वर्षमा नेपालमा ५ लाख इन्टरनेट प्रयोगकर्ता थपिएका छन् । नेपाल दुरसञ्चार प्राधिकरणले जनाएअनुसार २०७८ को वैशाख महिनासम्म कूल १५ लाख ५३ हजार ९९८ प्रयोगकर्ता रहेकोमा गत चैत महिनासम्म आउँदा इन्टरनेट प्रयोगकर्ताको संख्या २० लाख ५३ हजार ८०९ पुगेको हो ।

प्राधिकरणले जनाएअनुसार नेपालमा फाइबर इन्टरनेट प्रयोगकर्ताको संख्यामा ह्वात्तै बृद्धि भएको छ । प्राधिकरणका अनुसार पछिल्लो एक वर्षको अवधिमा नेपालमा ५ लाख ८५ हजार ९०३ ग्राहक बढेका छन् । ०७८ को वैशाखसम्म १३ लाख १३ हजार ४५१ फाइबर इन्टरनेटको प्रयोगकर्ता रहेकोमा पछिल्लो चैतसम्म १८ लाख ९९ हजार ३५४ पुगेको छ ।

प्राधिकरणका अनुसार वर्ल्डलिंक कम्युनिकेशले सबैभन्दा बढी फाइबर प्रयोगकर्ता थपेको छ । वर्ल्डलिंकले एकै वर्ष १ लाख ५२ हजार ६८० प्रयोगकर्ता थपेको छ । अन्यको तुलनामा सुरक्षित र प्रभाकारी भएकोले पछिल्लो समय फाइबर इन्टरनेट प्रयोगकर्ताहरुको संख्या बढेको विज्ञहरुको भनाइ छ ।

प्राधिकरणका अनुसार योबीचमा वायरलेस इन्टरनेट प्रयोगकर्ताको संख्यामा भने निकै कमी आएको छ । अघिल्लो वर्ष ४२ हजार ८१३ वायरलेस इन्टरनेट प्रयोगकर्ता रहेकोमा जुन घटेर २६ हजार ७ सय ८७ मा सिमित भएको छ । यो संख्या अघिल्लो वर्षको वैशाखको तुलनामा करिब १६ हजारले कम हो ।

त्यस्तै, केवल इन्टरनेट प्रयोगकर्ताको संख्या १ लाख २७ हजार ६६८ पुगेको छ । यो संख्या गत वर्षको भन्दा झण्डै ७० हजारले कम हो । गत वर्ष केवल ईन्टरनेट प्रयोगकर्ताको संख्या १ लाख ९७ हजार ७३४ रहेको थियो ।

वर्ल्डलिंक पहिलो र आक्रामक

नेपाल दुरसञ्चार प्राधिकरणले उपलब्ध गराएको पछिल्लो तथ्याङ्कअनुसार नेपालमा ५७ कम्पनीले इन्टरनेट सेवा दिइरहेका छन् । तिनीहरुमध्ये नेपाल दुरसञ्चार, वर्ल्डलिंक, भाइनेट, सुविसु, डिस होम, क्लासिक टेक, सिजी कम्युनिकेसनलगायतका सेवा प्रदायकले बजारको महत्वपूर्ण हिस्सा ओगटेका छन् ।

प्राधिकरणको रिपोर्टअनुसार अहिले नेपालमा सबैभन्दा बढी इन्टरनेट प्रयोगकर्ता वल्र्डलिंक कम्युनिकेशका छन् । वर्ल्डलिंकले पछिल्लो चैतसम्म ६ लाख ३० हजार २७९ ग्राहक पु¥याएको छ । जुन अघिल्लो वर्षको तुलनामा १ लाख ५१ हजार बढी हो ।

वर्ल्डलिंकपछि नेपालमा सबैभन्दा बढी इन्टरनेट प्रयोगकर्ता नेपाल दुरसञ्चार प्राधिरकणका छन् । पछिल्लो तथ्यांकअनुसार दुरसञ्चारका प्रयोगकर्ता २ लाख ९८ हजार ३९१ पुगेका छन् । वल्र्डलिंकले आक्रामक रुपमा ग्राहक बढाउँदा दुरसञ्चारले भने खासै ग्राहक बढाउन सकेको छैन । एक वर्षको तुलनामा दुरसञ्चारले जम्मा ४ हजार ६११ ग्राहक संख्या बढाएको छ ।

नेपालमा सुविसु, क्लाकिस टेक र भायोनेट निकै प्रतिस्पर्धी संस्थाको रुपमा देखिएका छन् । बराबरी जस्तो प्रयोगकर्ता यी संस्थाले एक वर्षको अवधिमा निकै राम्रो संख्यामा नयाँ प्रयोगकर्ता पनि थपेका छन् ।

कुनका ग्राहक कति ?

वर्ल्डलिंक : ६ लाख ३० हजार २७९

नेपाल दुरसञ्चार : २ लाख ९८ हजार ३९१

सुबिसु : २ लाख २१ हजार ९०२

क्लासिक टेक : २ लाख १६ हजार ४५३

भायोनेट : १ लाख ७२ हजार ३७७

डिस मिडिया : ९५ हजार ७६३

टेक माइण्ड नेटवर्क : ८९ हजार ११

वेभ सफर : ६९ हजार ७३५

बाेर्डलिंक : ५३ हजार ४४४

सिम्पल मिडिया : २२ हजार ९८६

सिजि: २२ हजार २९५