हामी सबैकाे संसारन्यूज

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ पदाधिकारी चयनको लागि आन्तरिक छलफलमा जुटेका छन् । केन्द्रीय समिति बैठक स्थगित गरेका अध्यक्ष प्रचण्डले पूर्वस्थायी कमिटी सदस्य र प्रदेश इन्चार्ज सहभागि गराएर पदाधिकारी चयनबारे छलफल सुरु गरेका छन् ।

प्रचण्ड निवास खुमलटारमा जारी बैठकमा पदाधिकारी, स्थायी समिति सदस्य र पोलिटब्यूरो टुंगो लगाउने विषयमा छलफल भइरहेको एक नेताले जानकारी दिए । प्रचण्डका स्वकीय सचिव रमेश मल्लले आवश्यक गृहकार्यका लागि छलफल सुरु भएको जानकारी दिए ।

आइतबारदेखि सुरु भएको माओवादी केन्द्रीय समितिको तेस्रो बैठकमा सहभागि सदस्यहरुले पदाधिकारी चयन तत्कालै गर्नुपर्ने माग राखेका थिए । सदस्यहरुले आवश्यक परे बैठक लम्ब्याउन पनि सुझाएका थिए । बैठकमा पदाधिकारी चयन पछि अन्य विषयमा प्रवेश गर्नुपर्ने माग उठेको छ ।

मंगलबारको बैठकमा अध्यक्ष प्रचण्डले सदस्यहरुले उठाएको प्रश्नको जवाफ दिने कार्यक्रम थियो । तर, पदाधिकारी चयनको विषय टुंग्याउन सकस बनेसँगै प्रचण्डले बैठक नै स्थगित गरेर खुमलटारमा बैठक बसालेका हुन् ।

माओवादीभित्र विशेषगरी महासचिव पदको विषयले किचलो बनेको छ । गत पुसमा पदाधिकारी चयन गरेर महाधिवेशन सक्ने कार्यसूची बनाइएको भएपनि महासचिवकै विषयले महाधिवेशन पदाधिकारी चयन नै नगरी स्थगित भएको थियो ।