Sansar News
काठमाडौं । हाल देशैभरी सक्रिय रहेको मनसुनी वायुको प्रभावका कारण देशैभरी आँशिकदेखि सामान्य बदली रहनेछ ।
मौसम पूर्वानुमान महाशाखाका अनुसार आज दिउसो प्रदेश नं १, बागमती प्रदेश र गण्डकी प्रदेश केहि स्थानहरूमा तथा बाँकी प्रदेशहरूका थोरै स्थानहरुमा मेघ गर्जन/चट्याङ सहित हल्का देखि मध्यम वर्षाको सम्भावना रहेको छ ।
त्यस्तै राति पनि प्रदेश नं १ र मधेश प्रदेशका एक–दुई स्थानहरु साथै बाग्मती प्रदेश, गण्डकी प्रदेश, लुम्बिनी प्रदेश, कर्णाली प्रदेश र सुदूरपश्चिम प्रदेशका थोरै स्थानहरुमा भारी वर्षाको समेत सम्भावना रहेको पनि महाशाखाले जनाएको छ ।
त्यसैगरी आज महाकाली नदीको वहाब उल्लेख्ञ बढ्ने र सतर्कता तह आसपास पुग्न सक्ने हु्नाले सतर्कता अपनाउन बाढी पूर्वानुमान महाशाखाले अनुरोध गरेको छ ।
आज पाँचथर, ताप्लेजुङ, संखुवासभा, ओखलढुंगा, रामेछाप, काभ्रेपलान्चोक, सिन्धुपाल्चोक, काठमाडौं, ललितपुर, भक्तपुर, मकवानपुर, धादिङ, नुवाकोट, गोरखा, लमजुङ, तनहुँ, कास्की, पर्वत, स्याङजा, गुल्मी, बाग्लुङ, सुर्खेत, दैलेख, अछाम, बाजुरा, डोटी, बझाङ, दार्चुला, बैतडी, डडेल्धुरा र कन्चनपुर र आसपास भएर बहने स–साना नदीहरुमा बहाव बढ्ने र केहीमा आकस्मिक बहाव बढ्ने हुनाले सतर्कता अपनाउन अनुरोध गरिएको छ।
वि.सं.२०७९ असार २४ शुक्रवार ०९:३६ मा प्रकाशित
