Sansar News
काठमाडौं । आज देशका पहाडी भू–भागका धेरै स्थानहरूमा र अन्य भू–भागका केहि स्थानहरूमा मेघ गर्जन/चट्याङ्ग सहित हल्का देखि मध्यम वर्षाको सम्भावना रहेको छ ।
त्यसैगरी सुदुर पश्चिम, लुम्बिनी, गण्डकी र बागमती प्रदेशका थोरै स्थानहरुमा भारी वर्षाको सम्भावना रहेको छ ।
त्यस्तै राति पनि देशको पहाडी भू–भागका थोरै स्थानहरूमा र अन्य भू–भागका केहि स्थानहरूमा मेघ गर्जन÷चट्याङ्ग सहित हल्का देखि मध्यम वर्षाको सम्भावना मौसम पूर्वानुमान महाशाखाले जनाएको छ ।
त्यसैगरी आज सिन्धुपाल्चोक मेलम्चीको नकोटे र आसपास भारी बर्षा मापन गरिएको छ ।
बाढी पूवानुमान महाशाखाका अनुसार हाल मेलम्ची नदी नकोटेको बाढीमापन केन्द्रमा जलसतह १.५ मिटरले बढेकोले मेलम्चीको तटिय क्षेत्रमा आकस्मिक बाढी हुनुका साथै कमजोर भिरालो जमिनमा पहिरोको जोखिम हुन सक्ने हुनाले भोलि बिहान सम्म अति उच्च सतर्कता अपनाउन अनुरोध गरिएको छ ।
त्यस्तै पछिल्लो २ घण्टा काठमाण्डौको विष्णुमती, धोवीखोला जलाधारमा भारी बर्षा मापन भएको छ । विष्णुमती गंगबु बसपार्क बाढी मापन केन्द्रमा जलसतह २ मिटले बढेको तथा विष्णुमतीको पानी किनारको बस्ती र सडकसम्म आउन सक्ने हुनाले भोलि बिहान सम्म तटिय क्षेत्रमा उच्च सतर्कता अपनाउन अनुरोध गरिएको छ।
वि.सं.२०७९ साउन ५ बिहीवार ०७:२८ मा प्रकाशित
