हामी सबैकाे संसारन्यूज

काठमाडौं । चुनावको मितिबारे निर्णय गर्न बोलाइएको मन्त्रिपरिषद् बैठक अघि प्रधानमन्त्री शेरबहादुर देउवाले प्रमुख प्रतिपक्षी दल एमालेका अध्यक्ष केपी शर्मा ओलीसँग संवाद गर्न चाहेको तर, हुन नसकेको देउवाका सहयोगीले बताएका छन् । शुक्रबार सत्ता गठबन्धनको बैठक पछि सञ्चारकर्मीसँगको कुराकानीमा देउवाका सहयोगीका रुपमा चिनिएका सञ्चारमन्त्री ज्ञानेन्द्रबहादुर कार्कीले यस्तो बताएका हुन् ।

उनका अनुसार देउवाले आफ्नै मोबाइलबाट ओलीलाई पटक–पटक फोन गरेका थिए । तर, ओलीले नउठाएको उनले बताए ।

“प्रधानमन्त्रीज्यूले फोन गर्नुभएको थियो, म पनि त्यहीँ थिएँ तर, संवाद हुन सकेन”, कार्कीले भनेका छन् ।

एमालेका केही नेताहरुले निर्वाचनको मिति घोषणाबारे प्रतिपक्षीसँग छलफल नै नगरिएको प्रतिक्रिया दिएका छन् । एमालेका नेताहरुको प्रतिक्रियाप्रति कार्कीले यस्तो कुरा बताएका हुन् । तर, कार्कीले चुनावको मिति घोषणा अपेक्षित भएको पनि बताएका छन् ।