हामी सबैकाे संसारन्यूज

काठमाडौं । बझाङको बुङगल नगरपालिका ९ रारुमा एकै परिवारका तीन आमाछोरा र छोरी झुण्डिएको अवस्थामा फेला परेका छन् ।

सोहि वडाका वडा अध्यक्ष हरिश बहादुर सिंहका अनुसार रारुका २२ वर्षीय गीता पार्की, उनकी ५ वर्षीया छोरी र ३ वर्षे छोरा घर नजिकै १०० मिटर परको मकैबारीमा झुण्डिएको अवस्थामा आज बिहान मृत फेला परेका हुन् ।

राति राम्रै खाना खाएर सुतेका उनीहरु बिहान ६ बजे मकैबारीमा झुण्डिएको अवस्थामा छिमेकीले मृत फेला पारेको सिंहले जानकारी दिए ।

‘ भारतमा मजदुरी गर्न गएका गीताका श्रीमान पुस्कर पार्की हिँजो नै भारतबाट फर्किएका रहेछन् । गाडीबाट झरेर ४ घण्टा हिँडेर घर पुगेका उनी सबैले राम्रैसँग खाना खाएर सुतेको बताएका छन्,’ वडा अध्यक्ष सिंहले संसारन्युजसँग भने, ‘इलाका प्रहरी कार्यालयको नियन्त्रणमा रहेका ३० वर्षी पुष्करले आफुले केही थाहा नपाएको बयान दिएका छन् ।’

आर्थिक अवस्था कमजोर रहेको गीताको परिवारमा बिहान काम गरेर साझको लागि जोहो गर्ने स्थिति रहेको सिंहले बताए । ‘छिमेकीले पनि सो दिन उक्त परिवारमा झै–झगडा भएको थाहा नपाएको बताएका छन् । के भएको थियो भन्ने अनुसन्धानपछि नै थाहा होला ।’

जिल्ला प्रहरी कार्यालय बझाङले प्रहरी निरीक्षक रमेश अवस्थीको टोली घटनास्थलतर्फ गएको जनाएको छ भने इलाका प्रहरी कर्यालय बुंङ्गलको टोलीले घटनाको अनुसन्धान गरिरहेको पनि सिंहले जानकारी दिएका छन् ।