हामी सबैकाे संसारन्यूज

काठमाडौं । प्रतिनिधिसभा र प्रदेशसभामा चुनावी तालमेल गरेर जाने सहमति गरेका दलहरुबीच सिट बाँडफाँटमा भने किचलो देखिएको छ । दलहरुले पूर्ववत् अडान नछाडेपछि बिहीबार बसेको बैठक बिना निष्कर्ष टुंगीएको छ । लामो तयारी पछि बसेको बैठक पनि छिट्टै टुंगीएको थियो ।

कार्यदलका सदस्यसमेत रहेका सञ्चार तथा सूचना प्रविधिमन्त्री ज्ञानेन्द्रबहादुर कार्कीले जनाएअनुसार अर्को बैठक साउन ३० मा बस्नेछ । उनका अनुसार बिहीबार बसेको बैठकमा सिट बाँडफाँटको विभिन्न मोडालिटीबारे छलफल भएको थियो । बैठकमा सबै दलले सिट बाँडफाँटका लागि पार्टीका आधारहरु प्रस्तुत गरेका थिए ।

कांग्रेसले अडान नछाडेपछि माओवादीको नयाँ प्रस्ताव

कांग्रेसले सुरुवातदेखि नै न्यूनतम ६०/४०को अनुपातमा सिट बाँडफाँट हुनुपर्ने प्रस्ताव सत्ता साझेदारसँग राखेको छ । १६५ निर्वाचन क्षेत्रमध्ये आफुँले कम्तिमा ९९ सिट पाउनुपर्ने अडान कांग्रेसको छ । तर, दलहरुले कांग्रेसको प्रस्तावलाई ठाडै अस्वीकार गरेका छन् ।

सिट बाँडफाँटको आधार ५०/५० हुनसक्ने प्रस्ताव राख्दै आएको माओवादी केन्द्रले पनि कांग्रेसले अडान नछाडेपछि ६० सिट आफुँलाई दिएर बाँकीमा कांग्रेसले भागवण्डा गर्न सुझाब दिएको छ ।

२०७४ को निर्वाचनमा आफ्नो पार्टीले ५९ सिटमा उम्मेदवार उठाएको र ३६ सिटमा जितेको भन्दै ६० सिट पाउनुपर्ने प्रस्ताव माओवादीको छ ।

“अघिल्लो चुनावमा हामीले ५९ सिटमा उम्मेदवार उठाएका थियौं, जहाँ हामीले ३६ सिट जित्यौं”, माओवादीका एक स्थायी समिति सदस्यले भने, “यसपटक न्यूनतम ६० सिटमा उठाउनु पर्छ । हाम्रो सिधा प्रस्ताव हामीलाई ६० सिट दिएर १०५ मा कांग्रेसले मिलाओस् भन्ने छ ।”

१६५ मध्ये कांग्रेसले ९९ र माओवादी केन्द्रले ६० को अडान राखेसँगै बिहीबारको बैठक अनिर्णित भएको थियो ।