हामी सबैकाे संसारन्यूज

काठमाडौं । काठमाडौं महानगरपालिकाका मेयर बालेन्द्र साहले कुनै अवरोध नभएर आजदेखि फोहोर बोकेका गाडीहरु बञ्चरे डाँडा पुग्ने बताएका छन् ।

शनिबार बेलुका फोहोर बोकेका १५२ वटा गाडी बञ्चरे डाँडा पुगेको बताउँदै अवरोध नभए आइतबारदेखि दैनिक २५० देखि ३५० गाडीहरु फोहोर बोकेर बञ्च्रे डाडाँ पुग्ने बताएका हुन् ।

‘आज फोहोरका १५२ वटा गाडीहरु बञ्चरे डाँडा पुगेका छन् । कुनै अवरोध नभएमा भोलिबाट दैनिक २५० देखि ३५० गाडीहरु फोहोर बोकेर बञ्चरे पुग्ने छन् । तर काठमाण्डौँको ७५ गाडी र त्यति नै मात्रामा अरु पालिकाहरुबाट पनि दैनिक उत्सर्जन हुने भएकाले दैनिकरुपमा १५० गाडी फोहोरको व्यवस्थापन हुनुपर्छ । यसैले नियमित अवस्थामा पुग्न केहि समय लाग्नेछ । यसमा सबैको सहकार्यको आवश्यकता छ । शाहले शनिबार बेलुका सामाजिक संजालमा लेखेका छन् ।

साहले यसका लागि अवरोध नगर्ने स्थानीय, फोहोर संकलन तथा लैजान सफाइ कर्मचारी तथा चालकहरु तथा अवरोध खुलाउँन क्रियाशील सुरक्षाकर्मी तथा सम्बद्ध सबैलाई धन्यवाद दिएका छन् ।

‘सँगसँगै हामी यो पनि विश्वास दिलाउन चाहन्छौँ कि हामी कुनै पनि हालतमा सिसडोलको दुरावस्था बञ्चरेमा दोहोर्याउने छैनौँ । थुप्रिएका फोहोरहरुको व्यवस्थापन नभइ अन्य विकल्पहरुमा जानु व्यवहारिकरुपमा कठिनाइ भएकाले मात्रै बाध्य भएर अहिलेको व्यवस्थापनको तरिका अपनाइ रहेका हौँ ।’ साहले भनेका छन् ।

उनले फोहोरको दीर्घकालिन व्यवस्थापनका लागि बिभिन्न योजना रहेको र त्यसलाई हदैसम्म प्रयास गरिने बताएका छन् ।
‘हाम्रो अन्तिम लक्ष्य फोहोरको त्यस्तो व्यवस्थापन हो, जहाँ कसैले फोहोरले आक्रान्त हुनु पर्दैन, कसैले गुमाउनु पर्दैन र सबैको साझा जित हुनेछ ।’